Saddleback Kohhranin kum 35 a tling

Khawvel huapa kohhran lar leh ṭang chak, Rick Warren-a kohhran, a din leh enkawl Saddleback Kohhran chuan kum 35 a tling a, hemi pual hian Inrinni kalta khan hun an hmang.

Saddleback Kohhran hi Rick leh Kay Warren ten, Lake Forest, California-a an din kha a ni a, a tirah chuan kohhran member 60 chauh an nei. Tunah chuan kohhran member 30,000 zet an nei tawh a, hei mai bakah hian California state chhim lamah hian campus 10 zet an nei a, khawvel hmun dangah branch church kan tih ang deuh, anmahni enkawlna hnuaia awm tho si kohhran 10 a awm tawh.

He kohhran hi kum 1980 kuma din kha a ni a, kohhran an din aṭanga Rick Warren-a thusawi hmasa ber chu 'Pathian tan thil ropui tak kan ruahman ngam avangin kan hlawhtling ang' tih hi a ni. 'Hmelma pa tana buaina thlentu nun in neih ka duh a...Pathianin ti tura duh che chu ti mai rawh...' tiin a sawi. Hemi ṭuma a thupui chu 'Rin ngamna' a ni.

Tunlai US-a kohhran lian leh ṭhang chakte zinga mi, Saddleback Church-ah hian Pathianni ṭum khat inkhawmah chawhrualin mi 26,000 te an inkhawm ziah ṭhin. A enkawltu Rick Warren hi US-a mite zah leh ngaihsante zinga mi a ni.