'Women In The Castle'-ah Daisy Ridley

'Star Wars' actress Daisy Ridley chu Indopui II-na behchhana film siam tur 'Women In The Castle'-ah a chang dawn.

'Women in the Castle' hi Jessica Shattuck lehkhabu ziah kum 2017-a tlangzarh New York Times Bestseller pawh lo ni tawh a ni a, Nazi hotupa Adolf Hitler thah tumna lam hawi niin Kristin Scott Thomas, leh German actress Nina Hoss-te pawh an chang dawn tih a chiang tawh bawk.

Jane Anderson chu director a ni dawn a, ani hi kum 2017-a 'The Wife' siam tawhtu kha niin nakkum kumtir lamah hian Europe khawchhak lamah production ṭan an tum a ni.

Daisy Jazz Isobel Ridley hi kum 28 a ni tawh a, English mi niin Star Wars sequel trilogy: The Force Awakens (2015), The Last Jedi (2017), leh The Rise of Skywalker (2019)-ahte khan chang vekin Rey lemah a chang a, Star Wars bakah hian film dang eng emaw zatah chang tawhin chung zingah chuan Peter Rabbit leh  Murder on the Orient Express pawh kha a tel.

Nakkum kumtira tlangzarh tum 'Chaos Walking'-ah Tom Holland nen an chang dun bawk a, hei lo pawh hi film channa tur dang leh chan mekna a nei nual a ni.