Xiaomi Redmi 2 an hralh hnem

Xiaomi chuan Thawhlehni khan Flipkart kaltlangin an smartphone thar, Redmi 2 chu flash-in an hralh chhuak leh a, hralh a kal cher cher leh hle. Second 87 chhung lekin unit 50,000 zet an hralh hman. Redmi hralh a ni leh dawn khan Flipkart-ah, he phone lei tum mi nuai hnih zet chu an in-register thar a ni.

Flash sale ringawta kan chân ṭhin Xiaomi hian flash sale lo deuha an siamchhuahte hralh turin hma an la chho mek zel. India-ah an siamchhuahten ngaihhlut leh duh a hlawh hle tih an hria a, dawr pangngaia lei theih turin an buaipui zel.

Tunah hian redmi Note 4G leh Mi 4 te chu flash sale loa hralh a ni tawh a, hetiang deuh bawk hian Xiaomi chuan Redmi 2 hi hralh turin an bei mek a ni.

Redmi 2 hmai hi inchi 4.7 zeta hlai a ni a, 720p HD IPS display a nei a, Android 4.4.4 KitKat a hmang. A hnunglam camera hi 8MP BSI f/2.2 a ni a, a hma lam hi 2MP BSI a ni a, a hmalam pawh hian video recording a theih. 64 bit 1.2 GHz Qualcomm Snapdragon 410 CPU chu a thluak a ni a, 1GB RAM a nei a, a ROM hi 8GB niin 32 GB thlenga lian microSD a hmang thei bawk. A battery hi 2,200 mAh a ni a, Quick Charge technology hman a ni a, charge full chhung pawh a rei lutuk lo ang.