Millionaire te chênna khawpui

A khawpuia mihring tam lam aṭanga chhuta millionaire tamna ber khawpui khawi khua nge ni ang? New York i ring mai thei mah se a ni lo. Singapore pawh a ni chuang lo. Dubai emaw, Abu Dhabi emaw pawh a ni chuang lo. Europe-a principality, mahnia ro inrel khawpui, Monaco hi a ni.

Monaco-ah hian mihring sing li emaw vel chauh an awm a, mahse millionaire-ten an bawh hle. He khuaa cheng mi sawm zela pathum chu millionaire an ni! Khaw hausa tak an nih chu. Hetiang taka millionaire tena an bawhna chhan chu chhiah a tlem vang te, bank ṭhat vang te, a hmunin a zir hrim hrim vang te a ni. Monaco-a mihring cheng zaa 29.21 te hi millionaire an ni.

Switzerland khawpui liante zinga mi Zurich hi millionaire ngah lamah chuan pahnihna a ni. He khawpui bik ngau ngau, municipality huam chhungah hian mihring nuai li vel an awm. Zu­rich hi Switzerland-a khaw­pui lian ber a ni a, mihring cheng zaa 27.43 te chu millionaire an ni.

Switzerland-a French ṭawng hmangte khawpui, Geneva hi millionaire ngah lamah pathumna a ni. Geneva municipality chhung bikah hian mihring nuai hnih vel an cheng a, heng zinga zaa 17.93 te chu millionaire an ni.

New York hi a lu nunga chhiar zawng chuan millionaire tamna ber a ni a, amaherawhchu za zela chhût zawng chuan palinaah a awm. Mihring maktaduai 10 vel awmna khawpuiah hian za zela 4.63 te hi millionaire an ni.

Germany-a khawpui lian pawl, Frankfurt chu millionaire kawl hnem pangana a tling pha. He khuaa mihring zaa 3.88 te chu millionaire an ni. He khua hi bank lamah chuan khawvel huap pawha khaw lar a ni. Kum 2010 khan Frankfurt-ah national bank in-registered hi 63 ngawt a awm a, international bank pawh 153 lai a awm. Germany-a bank lian ber ber, Deutsche Bank, Commerzbank, DZ leh KfW te hmunpui a ni.

London-ah hian mihring zaa 3.39 chu millionaire an ni a, Sweden khawpui Oslo chu pasarihna a tling pha a, Asia-a khawpui lar Singapore chu pariatna niin, Amsterdam chu pakuana a ni a, Italian khawpui lar Florence chu sawmnaah a lang pha. Millionaire kawl hnem khawpui 20 thlan chhuahte hi khawvel hmar chan lam vek a ni a, Asia-ah chuan Singapore bakah Hong Kong leh Doha te a lang. North America-a khawpui pali a lang a, Canada khawpui lian Toronto a lang tel. A bak chu Europe-a khawpuite an ni hlawm.