ONE DIRECTION aṭangin Zayn Malik a bâng

Taksa chaklohna avanga an band-in tour a neih mek a chawlh­san hnuah Zayn Malik chuan One Direction aṭanga a ban thu a puang.

Zayn-a hi bang mah se Harry Styles, Louis Tomlinson, Liam Payne leh Niall Horan te chuan band an la kalpui zel dawn a, kuminah an album panga-na tur tihchhuah an tum.

Zayn chuan a ban chhan sawiin, "One Direction-ah ka suangtuah ngai loh hlawhtlinna ka nei a, mahse kum nga a ral ve ta, tun hi kan band chhuahsan hun dik a ni. Kan fans te chungah ngaihdam ka dil a, ka rilruin dik nia a hriat chu ka tih a ngai ta a ni. Ka ban chhan chu kum 22 mi, mi pang­ngai tak nih ka duh a, mimala hun neiha, duh huna chawlh hahdam te ka duh a ni, Ka ṭhian pali te hian khawvela band ṭha ber nih an chhunzawm zel ka besei a ni," a ti.

One Direction dintu, Simon Cowell chuan Zayn-a'n 1D a chhuahsan chu pawi a tih thu a sawi rualin kum 2010-a Zayn a hriat aṭangin amahah hmasawnna tam tak a hmuh thu leh chhuan­awm a tih thu a sawi.

One Direction hi kum 2010 khan British television show lar, X Factor judge leh a dintu Simon chuan contestant te remkhawmin a din a, tun thlengin album pali- Up All Night (2011), Take Me Home (2012), Midnight Memories (2013) leh Four (2014) te an tichhuak tawh a ni.