Jenna Ortega-i'n hmeichhe James Bond a thlawp lo

Hollywood actress Jenna Ortega chuan mipa role awmsa, hmeichhe role anga siam rem ai chuan, anmahni puala action role nei hmeichhe character a thlan zawk thu a sawi.

He thu hi James Bond hmeichhe version anga siam a ni maithei tia sawi thawm a awm hnuah a rawn sawi chhuak a ni. "Tun hnaiah hmeichhe lead-na film a awm chho nual hi a lawmawm ka ti hle, a special bawk a ni. Mahse mipa role awm sa hmeichhe role anga siam chawp chu ka duh lo," a ti. Daniel Craig leh Ana de Armas pawhin gender thlak ringawt aiin, hmeichhe role ṭha zawk siam ṭhin a ṭhat zawk an rin thu an lo sawi tawh bawk. Hetih lai hian hmeichhe channa action film ṭha leh hlawhtling tak tak pawh a awm a, heng zingah hian "Atomic Blonde," "Salt," leh "Black Widow" pawh an tel.