Fashion Fiesta

Secondhand lane han lut ila, a chung sang ber bag dawr han chuan luh meuh chuan nalh dangdai tak tak kan hmu ngei ang. Secondhand ṭhatna deuh chu, a ‘ori’ kan ti ṭhin emaw ni kha. A ‘dup’ lo tihna a ni deuh ber. Thil ṭha tak man man deuh hleka lei theihna ni bawk si, kan sum lakluh mila thil ṭha leh tlo kan lo neih ve theih nan secondhand lo awm hi chu a ṭha ngawt mai.

Tun hma lamah kha chuan secondhand-a bag zingah de­sig­ners ho bag kan tih ang chi ho hi ṭha tak tak a tel fo a, vawiin thleng pawhin hmuh fuh chuan man hla tak a ni ṭhin. Heng zingah hian common em em mai leh tam em em mai, kawngsira bag sale karah pawh hmu la, i hmuh hmaih hauh lo tur khawp, tam leh common, a uk duk leh uk dal, lei rawng inpawlh, monogram (hawrawp chi hrang hmun khata ziah pawlh) dangdai tak common bawk si, L.V. tih chuang ngei mai ilo hmu ṭhin ngei ang le. He bag common em em si, a tak hriat hran theih loh khawpa a lem tam, keini India ram zau taka hmarchhak khaw daifema ram te tak te, Mizoramah pawh hmuh tur a tam dan em em hi, an lar ve tawk a ni phawt ang le. 'Tiang khawpa a lem tam tur chuan a tak kha a hlu ve tawk tihna a ni mai. Entawna siam ngai khawp chu a tak kha mi nazawng neih phak loh a ni ngei ang le. He bag, han en mai pawha design dangdai lutuk ni chuang si lo hi eng vanga mite hian duh em em nge an nih ang le? Secondhand lane-ah kal chhin teh, a tir lama an sale mai mai ṭhin kha, a zuartu lam pawhin a hlutna an hre chho a, secondhand mah nise a to chho ta em em mai a ni. A changkang tlat, chuti khawpa kan ngaihhlut leh ngaihsan, hmeichhia kei ka ni inti chinina ah/khai kan chak em em mai hi eng chiah nge a nih i'n en dawn teh ang.

LV tih chu Louis Vuitton tih lam tawi mai a ni a, fashion khawvelah chuan hming dai tawh ngai lo tur a ni. France ram khaw pakhat Anchay an tihah chuan 1821 daih tawhah khan lo nei mi leh lukhum zuar ṭhin nupa te inkarah Louis Vuitton hi a lo piang a. Chhungkaw kut them thiam tak aṭanga seilian niin, pangngai takin a khawsa chho a. Kum 10 mi anih chuan vanduaithlak takin a nuin a boralsan a, a pa khawhar chuan rei vak loah nupui dang nei lehin, a nuhrawn nen chuan an inmil lo hle a, chutiang chhungkuaa seilen chu tum loin chumi hnu, kum 3 liam hnu chuan an ram khawpui ber Paris panin a tlan bo ta a ni.

Kum 2 dawn lai mai Paris thleng tur hian a thang a, ke ngata kalin mel 292 dawn lai mai a kal ngat ngat a, a kalkawngah hian a ṭul leh rem lai laiah a riak tawp ṭhin a, ei tur leh eng ilo fahran a lei nan a inhlawh lawp lawp chang a tam mai. Naupangte mah nise a chhel em em a, a tum a ruh hle bawk. Paris a thlen meuh chuan thingrem leh box siama eizawng Marechal chuan a hna zirtir paha inhlawh turin a ruai a. Kum 17 lai mai heap bula a thawh hnu chuan kum 17 mi lek Clemence chu nupuiah a nei a, nupui a han neih meuh chuan mahni kut kea din duhna a lo nei chho ṭan ta a ni.

Kum 1854 chuan amahin a indang ve ta rawih a, kum 4 a liam meuh chuan thingrem kil li nei changkang tak mai a lo siam chhuak ta a. Hemi ṭuma a thil siamte hian mite ngaihhlut a hlawh hle mai a, a chhan chu hemi hunlai, kum zabi 19 na chhoah kha chuan thingrem/box bial kha mi tam zawk hman tlangpui a ni a. Hetia a design dang deuh rawn chhuak chu mite hlut a hlawhin, khatih hun laia an lal Napoleon III na nupui Eugenie chuan a kuthnu ṭha tak chu duhin a mimal thingrem siamtu leh rem ṭhatu ni turin a ruat ta a. Dangdai tak leh mi tihdan lo anga a tih ṭhin vangin a customer te an lungawiin, an lal nupui zarah mi hausa leh challang zawk te, customer tam tak a hmu chho a, dawrtu a ngah tual tual a, khawvelin an hre chho ta a ni.

Kum 1997 a lo nih meuh chuan thawmhnaw lampang siam chhoin, designer thiam tak Marc Jacobs thawhpuiin, ani hi artistic director niin, an clothing line bik a enkawl chho ta zel a, mi tam berin kan hmelhriatna erawh an bag leh logo a nih miau avangin, vawiin thlengin mi lar leh hausa ten intihchangkan siak nan an thilsiam te hi an inneih tam siak a ni ta deuh ber mai. In chhung bungrua, mipa thawmhnaw aṭanga hmeichhe thawmhnaw thlengin an brand hian an siamchhuak ta a ni deuh ber. Vanduaithlak takin kum 1892 daih tawh khan kum 70 mi niin Louis Vuitton hming putu hi a boral hlauh mai a. A fapa Georges hian an company hi enkawl chhunzawmin, vawiin thlengin an tute an inhlan chho ta zel a ni.

Tluangpuii Hmar
Instructress
Vakiria Institute of Fashion Technology