Nerds of War leh Myn’X te an la ding chang

MSL halftime Dance Battle kar hmasa chhunga neihah khan chak loh ṭum la nei lo Nerds of War leh Myn’X te an chak leh a, Anonymous Signs pawh hma an sawn a, a vawi khat nan an rawn chak ve bawk. Nerds of War hi Khatla TBL Home crew niin, Myn’X hi Zarkawt Serpents Home crew an ni a, Anonymous Signs hi Zarkawt BCA Away crew an ni thung.

Ningani zana Chaltlang Ryders leh Zarkawt BCA inkhelah, Ryders Home crew Sharp Kats leh BCA Away crew Anonymous Signs te an inhmachhawn a, Sharp Kats hi hmeichhe hlang an ni a, formal suit duma rawn inthuamin, nihliap nen an rawn lam a, hmuhnawm mah se an lam hmasa an tluk lo deuh a, execution an tlakchham avangin chak lo zawkah an ṭang ta a ni. Anononymous Signs hi mipa hlang an ni thung a, B-boying leh Animation rawn hmangin, an performance hi a hmuhnawm dangdai hle a, tricks harsa tak tak te rawn telhin chak zawkah an ṭang. Anonymous Signs hian battle vawi 4 an hmachhawn tawh a, an chak hmasak ber ṭum a ni a, battle pakhat chiah hmabak tawhin, an rawn ṭan hle a ngai dawn.

Zirtawpni tlaia Khatla TBL leh Tuikual South BC inkhel hmuhnawm takah, TBL Home crew Nerds of War te leh Tuikual South Away crew Myztic Movers te an lam. Myztic Movers-ah hian an hmeichhe member neih chhun chu harsatna a neih avangin a lam thei lo a, mipa 4 an rawn lang. An style hi crew dang lakah a dangdai hle a, Street Jazz leh Funk choreography te hmangin an hmuhnawm thei hle. Mahse hneh zawh loh Nerds of War lakah an tlawm ta zawk a ni. Nerds of War hian an performance atan Contemporary leh Hip Hop an rawn mix a, an taksa flexibility leh fitness an rawn hmang thiam hle.

Zirtawpni zana Zarkawt Serpents leh Mission Veng Vikings inkhel ṭang takah, Serpents Home crew Myn’X leh Vikings Away crew Dance & Beatz te an in-battle thung. Dance & Beatz, hmeichhe hlang crew te hi an costume an rawn bei nalh thei hle a, props atan chair, bicycle, ballon, tray leh skipping rope an rawn hmang a, an concept leh idea chu ṭhamah se an crew naupanna leh zirna hun neih tlem chu a rawn lang chhuak a, an che buai deuh a, an lam hmasa zawk pawh an tluk pha ta lo a, mahse potential nei ṭha tak crew chu an la ni tho. Myn’X-ah hian mipa hlang pali rawn lâmin, bamboo stick te rawn veiin an lam ṭha hle. Simple deuh si, nalh deuhin an rawn chhuah. Anni hian chak loh ṭum la nei bik lo mah se an lamah hmasawnna tur a la awm nual.

Zirtawpni tlai khan Halftime dance battle neih hmain, special dance performance neih a ni a, hetah hian Mizo Dance Camp: Spring Intensive zirlai te leh SBI Life Insurance leh Zonet buatsaih Mizo Little Champ-a pakhatna, Vanlalrinsanga leh Top 15 a tling dancers dangten lam huhnom tak an entir a, mipui lawm pawh a hlawh hle. An vai hian dancer 40 niin, kum 15 chin hnuailam an ni. Alan Rinawma leh Marcus Dyndyn-a te choreography niin lyrical hip hop, animation leh dancehall te mix a ni. Mizo naupang ten lam lamah hma an sawn tawh hle tih an rawn hmuhtir a. He an performance hi MDC Spring Intensive kharna a ni nghal. June thla chhung hian Mizo Dance Camp 2015, buatsaih a ni leh ang.