Fashion Fusion 2015 mipuiin an hlut

Zirtawpni zan khan Vakiria Institute of Fashion Technology buatsaihin 3:16 Plan Solution Fashion Fusion 2015 chu Lal Thanhawla Auditorium, Congress Bhavan-ah neih a ni ta a, hetah hian VIFT-a zirlai 26 tena an thuamhnaw siam chi hrang hrang chu model 26 ten an inbel chhuahsak.

Zirlai pakhat hian thawmhnaw chi nga zel an siam a, chu chu model-te hian an ha chhuak a ni. Kumin hian theme-ah 'History of Fashion' hman a ni a, hei bakah hian zirlai tin hian anmahni leh an zirtirtute nena an thlan, theme an nei hrang ṭheuh bawk. Chung, anmahni theme leh theme-pui berte chawhpawlh, fuse chungin thuamhnaw hi an rawn siam chhuak a ni.

Zirtawpni zan hian Award, zirlai tiṭhate hnenah sem a ni. An ngaihhlut ber, VIFT-a zirlaitena dawn an chak ber ṭhin, Queen of Fashion Fusion 2015 hi Zochhuanmawii, Bethlehem Vengthlang chuan a dawng. Award dang an siam. Best Collection-ah F. F. Lalawmpuii, Saiha/ Aizawl Ramthar thlan a ni a, Best Garment Construction-ah Ruati, Lawngtlai; Best Creativity-ah Mary P. Lalremruati, Seling; leh Best Craft Endorsement hi J. Lalsanglianbi (Nui), Chawnpui ten an dawng. Model te hmai leh sam cheitu hi BDA, Champhai a ni.

VIFT hian Fashion Fusion 2015-ah hian anmahni collection an phochhuak bawk a, hetiang hi kum 2010 khan an lo nei tawh a, chumi hnuah an nei lo leh vang vang a, kuminah an collection hi an phochhuak leh a ni. VIFT aṭang hian mi 150 dawnin an zir chhuak tawh a ni.

Kumin Fashion Fusion-ah hian mipuiin an kal ṭha hle a, Hawla Auditorium an khat ṭha hle. Fusion-ah hian Essy leh Sentei (J. Lalremruati) te an zai a, mipuiin an hlut hle.