Maggie-in pakhatna a la hauh

Doctor-in zai rih lo turin a ràwn

'zai ngaina leh nuam ti em em ka ni si a, han zai loh chu a khawharthlak a, a hrehawm khawp mai'

Dafodils Ṭhazual Fakna chhuak hmasaah khan Maggie-i hla 'Hma­ngaihna par tlânin' tih chu pakhatnaah a awm a, he hla hmang tho hian Maggie hian Dafoldils Ṭhazual fakna tharah pakhatna par a la tlân rih.
'Hmangaihna par tlânin' tih hla hi Mamuana phuah a ni a, a vawi hnih nan pakhatna a hauh leh a, Maggie tan chuan a hlawhtlinna belhchhahtu a ni. Mizo hmeichhe zaithiam zingah chuan Maggie hi a hlawhtling ber pawl a ni a, Ṭhazual chart-ah phei chuan history siamtu a ni. Ṭhazual chart siam a nih a, Fakna hla huang bik tih chhuah hmasak berah khan Maggie hian a Krismas hla 'Emmanuela' hla hmang khan pakhatna a hauh a, pakhatna hauh hmasa ber a ni. Dafodils Ṭhazual chart-ah hian hla pali a dahte hmangin pakhatna a hauh vek bawk.
Hlawhtlinna Maggie-in a chan chhoh mek lai hian harsatna a tâwk ve det. A aw bâwm a vûn avangin a aw a chhâng a, doctor-te chuan hun eng emaw chen zai chawlhsan rih turin an râwn a, ani pawh a indîm hle. "Ka aw a chhâng reng a, ka aw bâwm a vûn vang a nia. Doctor-te chuan zai rih lo turin min hrilh a, ka zai rih lo. Mahse zai ngaina leh nuam ti em em ka ni si a, han zai loh chu a khawharthlak a, a hrehawm khawp mai," a ti. Eng chena rei nge a zai rih loh ang tih erawh Maggie hian a sawi thei rih lo. A dam chian veleh a zai leh ang.
Tunah hian Maggie hian music video thar, TBC Zaithanpuia nen an buatsaih mek a, a chhuak har lutuk tawh lo ang; shooting pawh an zo a, a behbawm, a chûlmam vel a ni tawh. He music video hi Social Welfare lamin an siamtir leh an ruahman a ni a, ruihhlo kaihhnawih hla a ni. Maggie chuan, "A ṭha dawn khawp mai a, a hla hian ka rilru a khawih hle a ni," a ti.
A hmaa Dafodils Ṭha­zual Faknaa pa­hnihna, Temi Sailo chu pathumnaah a chhuk thla a, Bethsy-i a rawn kai chho thung. Bethsy hi a hmain pathumnaah a awm. Parukna aṭangin Betea palinaah a rawn kai chho a, palina ṭhin Angela Lalremtluangi chu panganaah a chhuk thla ta thung.
Top 10 aṭangin TBC Zai­thanpuia hla Fak Zel Che Ka Duh chu a tawlh chhuak a, Empty Pockets chu 'I hnen lo thleng se' hla hmangin pakuanaah an rawn lang thar. Lalhlumawii hla 'Lei leh van siamtu' pawh a kiang a, ama hla thar tho 'Jebus-ho' chu a rawn lang thar bawk.

Dafodils Ṭhazual Fakna
1 Maggie - Hmangaihna par tlanin
2 Bethsy - Min hmangaih si a
3 Temi Sailoi - Kraws thu
4 Betea - Lungchhir a sawt lo
5 Angela Lalremtluangi - Min hrilh fo rawh aw
6 Tabithians - Hei hi ka duh ber
7 Lalhlumawii - JEBUS-ah
8 Hmingtea & Sailo Nutei – Kir leh rawh
9 Empty Pockets - I hnen lo thleng se
10 Pensy - Chhan tlak ka ni em ni