Miss India-ah Aditi Arya

Mumbai-a Yashray Studios-ah Femina Miss India World 2015 thlan a ni a, hetah hian Delhi nula, Aditi Arya chu thlan chhuah a ni.

Femina Miss India-ah hian Afreen Racheal Vaz chu first runner-up niin, Vartika Singh chu second runner-up-a thlan a ni. Femina Miss India hi Inrinnia thlan kha a ni. Aditi hian Miss World thlan hunah India ai a awh ang.

Femina Miss India thlannaah hian judge-ah milar tak tak an hmang a, chung zingah chuan John Abraham, Manisha Koirala, Sonu Nigam, Anil Kapoor, Firoz Nadiadwala, Abu Jani leh Sandeep Khosla, Shilpa Shetty, Sonali Bendre, Shiamak Davar leh Chitrangada Singh te pawh an tel.

John Abraham chuan, "Chhe lo ringawt kan en lo a, an personality uluk takin kan thlir a ni. Lan dan ringawt a ni lo a, nungchang a tel a, a chhan chu Miss India hian Miss World-ah India ai a awh dawn a ni," a ti.

Femina Miss India thlanah hian performer ṭha tak tak hmuh tur an awm. Kareena Kapoor a chhe lo reng a, a perform pawh a hmuhnawm a, Jacqueline Fernandes te, Shahid Kapoor leh zaithiam lai Kanika Kapoor, Meet Brothers leh Shalmali Kholgade te an zai bawk. Kumin hian Miss India hi khawpui lian 13-ah audition neih a ni a, region pathumah audition neih a ni bawk.

Tun ṭumah hian India ram hmun hrang hrang aṭanga nula nalh 21 te an inlan a, heng zinga mi tam takin chhe lo an tih, zawhna chhang thiam an tih chu North East nula, Haflong khaw chhuak, Gorkha nula chhe lo, Rewati Chetri hi a ni. Ani hi top 10-ah pawh a inhlangkai pha hial. Rewati hi North East hmeichhe zinga nula hmelṭha leh fing thlan chhuaha thleng sang berte zinga mi a ni. Pond’s Femina Miss India Kolkata 2013-ah khan Assam nula tho, Sagarika Chhetri chuan Pond’s Femina Miss Glowing Skin 2013 title a la tawh a ni. Rewati hian tunah hian Guwahati-a NEF Law College-ah LLB a zir mek.