Leonardo-a'n USD mtd 15.6 a pe leh tawh

Actor hlawhtling, Leonardo DiCaprio hi environment humhalh nan sum a pe hnem ṭhin hle tih kan hria a, tunah pawh sum tam tham tak a pe leh tawh.

Leonardo hian environment humhalh nan te, environment chhe mek siam ṭhat nan ten Leonardo Dicaprio's Foundation aṭangin USD mtd 15.6 zet a thawh leh tawh. Kum 1998 aṭang khan Leonardo hian environment tan hian sum a thawh ṭan a, hemi aṭanga tuna sum a pek chhuah leh te nen, pawisa a thawh tawh zawng zawng hi USD mtd 59 zet a ni ta.

Environment humhalh nan kawnga Leonardo-a'n a ngaihsan em em chu Pope Francis a ni. Tun ṭumah pawh hian a sawi chhuak a, "Scientific community-a mi zaa 99 te chuan climate change hi a awm ngei a ni kan ti a, mihringte avanga awm a ni. Climate change a thleng a ni tih pawm lo chuan science hi a pawm lo a ni. Thlarau lam hruaitu ni si, scientific movement phurpui hi a hmain kan hre ngai lo," a ti a, a hmaa Pope nena an lo inhmuh tawh chu sawi chhuak bawkin, "Hetiang mi ropui, environment humhalh nana ke pen nasa ka hmu thei hi vannei ka intiin intihtheihna tham niin ka hria," a ti.