Insiam ṭhat tum Sean 'Diddy' Combs

Kum 46 mi rapper Sean 'Diddy' Combs chuan tun hmaa a chet mawi lohna zawng zawngah ngaihdam a dil a, a nun dan chu insiam ṭhat a tum thu a sawi.

Zirtawpni khan Instagram lamah insiam ṭhat a tum thu hi tarlangin fa paruk ngawt mai nei tawh rapper chuan, "Kan zavaiin kan insiam ṭha thei a, mi hi kan inthlak danglam thei tih hi ka rin dan a ni a, mi dangte entawn tura awm hi ka duh a ni... tun kar tluanin ka chet dan leh ka ṭawngkam chhuakte ka ngaihtuah a, insiam
ṭhat ka mamawh tih ka hria. Ka
ṭawng a chaltlaiin a mawi lo hle tih pawh ka pawm a, inthlak danglam ngei ka tum," a ti.

A hming tak chu Sean John Combs tih ni mah se 'stage name' hrang hrang a nei a, chung zingah chuan Puff Daddy, Puffy, Diddy leh P. Diddy tihte a tel. Hip hop lama a lar leh hlawhtlin bakah hian record producer a ni a, entrepreneur a nih bakah actor a ni bawk. America leh khawvel mipui hmelhriat a ni a, mi hmaa chaltlai tak taka ṭawng leh mawi lo taka khawsak sim a tum a, insiam ṭhat a tum.

Grammy Awards vawi thum dawng a, MTV Video Music Awards pawh lo dawng tawh hi Fortune magazine chuan kum 2002 daih tawh khan top 40 entrepreneurs under 40n zinga 12-naah a lo dah tawh a; Forbes Magazine chuan kum 2015-a amah leh a thil neih hlutna a belhkhawm chu dollar maktaduai 735 angin an chhut a ni.