Ancelotti match hmasa berah Robben inhliam

German champion Bayern Munich manager Carlo Ancelotti chuan a club thar a enkawlna match hmasa ber ni turin Zirtawpni zan khan fifth division club Lippstadt nen friendly an khel a, 4-3 in hnehna an chang.

Bayern tan hian Arjen Robben leh Franck Ribery ten goal khat ve ve an khung a, goal hnih dang hi Lippstadt-in anmahni lama an tih luh a ni. He inkhelah hian Netherlands international hi minute 36-na lekah malpui na vangin lakchhuah a ngai a, rawlthar Mario Crnicki-a'n a rawn thlak.

Kum 32-a upa Robben hi player
ṭha tak ni mah se hliam vangin a buai ngun hle a, season hmasa pawh khan league match 15 zet chu hliam vangin a khel thei lo - tunah hian engtiang chiah-a na nge a nih hriat a la ni lo thung.

Real Madrid manager hlui Ancelotti chuan, "Robben khan a tihrawlah na a nei a, doctor-in a enfiah hnuah a dinhmun a chiang ang, nasa tak a nih loh kan beisei," a ti.

Italian manager-in German club a enkawlna match hmasa berah hian Robben leh Ribery bakah senior player dang Phillip Lahm leh Xabi Alonso te an inlan a, player langsar ṭhenkhat Euro 2016-a inlan te erawh club tan an la inkhel lo thung.