Zaninah "Million Dollar Boy"

Lalnunsiama (SVP) kutchhuak, One Vision Gospel Media film thar, "Million Dollar Boy" chu zaninah Vanapa Hall-ah tlangzarh a ni dawn a, Lersia Play-ah en theih a ni bawk ang.

"Million Dollar Boy" hi kum 2002-a Assam leh Meghalaya inkara misualten Aizawl-Guwahati sumo an suam ṭuma a u leh a chuanpuite aiawha pawisa hmuhna atan aan hruai tura inpe, Mizo tlangval chunga thil thleng behchhana siam a ni. Mizoram chhung bakah Assam hmun hrang hrangah chan niin, a chan chhung a a reiin a hautak a, an thawkrim hle tih SVP chuan a sawi.

"Ambush" film-a kan hmuh tawh, Sangtea Chhangte chuan main role a chang a, Kolasib tlangval Andrew Laltlankima pawh a changtu zingah hian a tel. Director of photography hi Lenry Renthlei niin, SVP nena an thawkdun kutchhuak hi en a manhla hle ang. Script writer hi David Lalrinsanga niin, producer a ni bawk. Audio engineer Dawngte leh, cinematographer hi Chamtea leh Tea Chhakchhuak te an ni.

Zanina film tlangzarhnaah hian One Vision chuan an Application siam chu Pathian hnena hlanna an nei nghal dawn bawk. He Apps hi Pathian thu thehdarhna atana siam niin, a duh apiang tan in sign-up kher loin Pathian fak hla, sermon, testimony leh lehkhabu (audio/visual) en leh ngaihthlak theih a ni dawn a ni.