LBS Suzuki Inter Branch YMA Short Film Competition 2024 : Pakhatna Ramhlun South Branch YMA "Ni Ropui"

Central YMA buatsaih LBS Suzuki Inter Branch YMA Short Film Competition, 2024 result chu September 5, Ningani zan khan LPS Arena, Falkland-ah puan a ni a, Ramhlun South Branch YMA chu pakhatna niin, lawmmanah Rs 1,00,000 leh Memento an an dawng.

Pakhatna lawmman dawngtu, Ramhlun South Branch YMA film hi 'Ni Ropui' tih a ni a, director Zonunsanga Kawlni niin, director of photography Abarim Lalrammawia leh script writer David Lalrinsanga te an ni. David Lalrinsanga hi Mizo film thar, 'Million Dollar Boy' script ziaktu kha a ni. 'Ni Ropui' hi ram leh hnam siamṭhat tumtu police inspector pakhat leh mi chi hrang hrang, thil tihsual inang lo tak tak an mante inkara thil thleng a ni a; zirna leh thiamna hmanga ram leh hnam humhalh a nih theih nan, a mi mante chungah theihtawp a chhuahna chungchang a ni.

Pahnihna Bungkawn Branch YMA chuan lawmman Rs 80,000 leh Memento dawngin, Chanmari West Branch YMA chu pathumna a ni a, Rs 50,000 leh memento an dawng bawk. Top 10-a lang dang Branch 7 hnenah consolation prize, Rs 10,000 leh Memento hlan an ni a, Branch 22 te hnenah participation prize Rs 1,000 leh Ceritificate hlan an ni bawk.

Short Film Competition-ah hian YMA Branch 32 in film an thehlut a, judge-te hi Lalsawmliana Pachuau, Zarkawt; Napolean RZ Thanga, Mission Veng leh Irene Lalruatkimi, Tlangnuam te an ni. Film ṭha zual 10 thlanchhuah zingah hian Bawrai Branch YMA, Durtlang Leitan Branch YMA, Mission Vengthlang Branch YMA, Ramhlun North Branch YMA, Ramthar North Branch YMA, Vaivakawn Branch YMA leh Zuangtui Branch YMA te an lang.

Mimal lawmman pawh siam niin, Rs 5,000 leh Memento hlan an ni.

Mimal lawmman dawngtute chu -

Best Actor - Eddie Tochhawng, Ramhlun South Branch
Best Actress - Vanlalhriatpuii, Ramthar North Branch
Best Director - Zonunsanga Kawlni, Ramhlun South Branch
Best Script Writer - H. Lalremruata, Bawrai Branch