Boomarang Taiwan-a Spring Scream Festival-ah an che dawn

Asia-a music fest ropui berte zinga mi, Taiwan-a Kenting hmuna Spring Scream Fes­tival-ah Mizo band ṭha leh hlawh­tling Boomarang an che dawn. Label nei ṭha leh India ram aṭanga tel tur awm chhun an ni bawk a, hmun pawh an chang ṭha dawn hle.

Spring Scream Festival hi April 3-5 chhung hian neih a ni dawn a, hetah hian band hrang hrang 100 chuang an che dawn a, chung zingah chuan Boomarang hi hmun chang ṭha berte zinga mi an ni dawn. April 5 hi main event a ni dawn a, he ni-ah hian an Boomarang hian Taiwanese te an awi dawn a ni. Fest an hmanna turah hian stage pariat ngawt a awm a, chung zinga stage pui berah chuan an perform ang.

He fest-a tel tur hian Boomarang hian an lo bei fo tawh a, tunah chuan an hlawhtling ta. Taipei-ah ṭhian ṭha an nei a, chu chuan tihpuiin kumin hian an hlawhtling dawn ta a ni. Tun hi India ram pawna zaia ṭum thum an chhuahna tur a ni ang. Vietnam-ah leh Thailand-ah an lo che tawh.

Boomarang guitarist Boom­boom-a chuan, "Ram danga kan lo chet tawhnate ngaihtuah chuan tuna mi hi chu pui tak a ni dawn. Nikum khan festival chhung zawnga chhimtu hi mi nuai hnih chuang zet an zet an ni a, Bangkok leh Vietnam te nen chuan mihring pawh intam hleih tak tur a ni," a ti.

Festival-ah hian Boomarang hian minute 50 chhung ngawt stage an chang dawn a, hemi hnu hian Taipei-a Indian Embassy-ah hun an hmang ang a, Taiwan-ah vek hian Riverside Light House-ah programme an nei bawk. English radio station-ah hun hmang tur an ni bawk a, mahse India-a rawn haw leh tura an lo inruahman ni chiah a nih dawn avangin an tipuitling thei ang em tih erawh a hriat loh.

"Kan phur tawh a, hun kan chan rei chhung hi minute 50 zet a nih avangin concert puitling ang deuh thaw hun kan nei dawn tihna a ni. Keimahni band bila kan chhuah vawi khatna tur a ni a, a hranpaa min buaipuitu an awm lem lo a, a huphurhawm deuh mai thei. Ramdanga kan lo chet tawhna ngaihtuah chuan tuna kan chetna tur hi chu a ropui zawk hle a, a chakawm hle zawk bawk," tiin Boomboom-a chuan a sawi.

Spring Scream Festival hi Taiwan-a International Festival ropui leh lian ber a ni a, kum 1995 aṭanga buatsaih ṭan tawh kha a ni.