Angelina Jolie film Unbroken Kristiante tan

Angelina Jolie-in film a siam, Indopui II behchhan, Unbroken kha, box office movie hlawhtling zinga mi kha, Universal Pictures chuan Kristiante pual tur deuh bika a edition siamin an tichhuak dawn.

Indopui II laia sipai huaisen tak, Louie Zamperini chanchina film siam, Unbroken kha Kristian tam tak chuan an sawisel nasa hle a, a chhan chu Zamperini hi Kristian ṭha tak leh Pathian ring tlat mi a ni. Unbroken-ah hian a rinna lam hlam chhiah a ni char char chu Kristianten an duh lo a, an sawisel hle a, thudik chu a nihna anga tarlan mai nise tiin an sawi a ni. Universal Pictures chuan Kristiante sawiselna hi a âwm hle a, thil dik tak a ni tih an hria a, an siam ṭha leh dawn a ni.

Kristiante puala an tihchhuah thar leh turah hian Unbroken tih hming an puttir tawh dawn lo a, Legacy of Faith an ti tawh thung ang.

Unbroken tihchhuah hlim a nih khan Kristiante sawiselna chu Jolie hian chhangin, "Mitin huapzo thei tur ang berin kan siam a, eng sakhua emaw bik tinzawn kan nei lo," a ti.