J. Lalremruati a vawi thumna

Lengzem lamah chuan J. Lalremruati tluk an la awm lo. Hapta ruk hnuah pawh J. Lalremruati hla, 'Inhrilh dun ang' tih chu Dafodils Ṭhazual Lengzemah pakhatna a la hauh thei.

Essy hla thar 'Hey' kha pathumnaah a rawn lang nghal a, pahnihnaah a kai chho a, pakhatna a luah mai a rinawm viau laiin J. Lalremruati, Sentei a la khawng ṭha tâwk a, pakhatnaah a la awm thei bik lo. Sentei hi a thiam a, a video a hmuhnawm a, a hla hi dangdai nalh zet mai, Mizo hla chhuak tawha a anpui vang tak a ni.

J&J hunlai aṭang tawha Zoram mipui hriat hlawh Sentei hian a dinhmun a chelh rei thei hle a, pakhatna ṭum thum a hauh ta. Inhrilh dun ang tih hla hi a unaupa, Tetea phuah a ni. Ani hi hla phuah lamah lar vût lo mah se, J&J hunlai aṭang tawhin a hla a hit thei hle a, hla phuah thiam tak a ni. Chu mai bakah music arranged a dik a, a changkang a, a dangdai a, a satuin a sa ngaihnawm thiam. Video-ah hian a performance a hmuhnawm hrim hrim bawk a, live-a a perform pawhin Sentei hi a zei a, a thiam tho.

Essy hian a hla 'Hey' nen hian heia dinhmun sang zawk hi chang thei dinhmunah a ding reng. A hla hi Myztic Sailo leh Lal K. Sailo te phuah a ni a, hemite pahnih hla phuahthiamzia kan hria a, Zorimawi khawvelah hnuhma tam tak an hnutchhiah tawh. Anmahni ngei pawh hi an zaithiam hle bawk. Essy hla thar 'Hey' hi Dafodils Ṭhazual chart-a thleng sang chak ber a ni a, chart-a a vawi khat lannaah pathumna a hauh nghal thei. DJ Lalvenhimi hnua hetiang dinhmun hauh thei hmasa ber a ni. Nikum khan DJ-i leh Michael M Sailo te hla, Liam Mai Rawh tih kha a vawi khat lannaah pathumnaah a lang nghal a ni.

C. Sanga, Mizo mipa zaithiam chuai thei lo chuan hma a rawn sawn sang zel a, pangana aṭangin pathumnaah a rawn kai chho tawh. Christy-i hla 'Chhingkhual D' chu a ngai, palinaah bawk a awm leh. Hei bakah hian a hla thar 'Tleitiri' chu sawmnaah aṭangfin pasarihnaah a rawn kaisang. Top 10-a hla pahnih emaw, a aia tam nei thei hi an la tam lo hle. A langsar zingah chuan DJ Lalvenhimi, TBC Zaithanpuia, Bethsy, Pensy te an ni. Henry Lalmalsawma Renthlei chu top 10-ah a rawn kir a, K. Lalhmangaihthangi chu top 10 aṭangin a chhuak ta thung.

Dafodils Ṭhazual Lengzem

1 J. Lalremruati - Inhrilh dun ang

2 Essy - Hey

3 C Sanga - Chhingkhual Lenmawi

4 Christy - Chhingkhual D

5 Lawmi Khiangte - Mangṭha

6 Kolkata Mizo Student - Kan ding ( Zoram tan)

7 Christy - Tleitiri

8 Sumeona - Ka bang ngei ang

9 DJ Lalvenhimi - Khua tuah loh di

10 Henry Lalmalsawma Renthlei - Lokir leh rawh