Furious 7-in beisei a phak chiang

Fast and Furious thar ber chuan a siamtute beisei aia sang a thleng a, a film hmasaho zawng zawng a rawn khum. Paul Walker vang a ni thei ang.

Paul Walker-a film chan hnuhnun ber, a thihsan tak, Furious 7 hian kar tawp chhung khan US bikah chauh USD mtd143.6 zet a la a, khawvel puma a sum hmuh chhuah zawng zawng chu USD mtd384 zet a ni. Furious-ho film zinga tihchhuah kara sum lalut hnem ber a ni.

Furious 7 hian The Hunger Games record a rawn khum bawk. US bikah chuan kum 2013 hnua opening week-a sum lalut hnem ber a ni a, a hmaa he record siamtu chu The Hunger Games: Catching Fire kha a ni. April thlaa film tihchhuah zinga sum lalut hnem ber a ni bawk. Captain America: The Winter Soldier kha April thlaa US-a film tihchhuahho zinga sum lalut hnem ber a ni ṭhin a, USD mtd95 a lalut a, tunah chuan Furious 7 hian a rawn khûm ta a ni. Hei mai bakah April-a movie tihchhuah zinga kar khat chhunga USD mtd100 lalut tling hmasa ber a ni bawk.

US-a opening week-a sum lalut hnem zingah pakuana a rawn ni nghal bawk. Hei mai bakah khawvel pumah, hapta khat chhunga movie sum lalut hnem ber palina a rawn tling a, sum lalut hnem pathumna chu The Avengers kha a ni a, USD mtd392.5 a ni a, pahnihnaah USD mtd394.4 lalut Harry Potter and the Half-Blood Prince kha niin, lalut hnem ber chu Harry Potter and the Deathly Hallows: Part II a ni a, USD mtd483.2 a lalut.

Box office top 10:

"Furious 7" - $mtd143.6

"Home (2015)" - $mtd27.4

"Get Hard" - $mtd12.9

"Cinderella" - $mtd10.3

"The Divergent Series: Insurgent" - $mtd10

"It Follows" - $mtd2.5

"Woman in Gold" - $mtd2

"Kingsman: The Secret Service" - $mtd1.7

"Do You Believe?" - $mtd1.5

"The Second Best Exotic Marigold Hotel" - $mtd1