Vibrio nei turin MZU a inbuatsaih

Mizoram University-in kutpui an hman ṭhin, Vibrio chu kumin pawh hian pui taka hman leh tumin an inbuatsaih mek. Vibrio hi April 13-17 chhung hian neih a ni ang a, ni nga chhung bakah zan khat hun hman a ni ang.

Kumin Vibrio-ah hian Rock Fest a awm leh dawn a, hei bakah hian Mizoram University Affilated hnuaia College zirlaite inelna lian ber Runway Showdown a awm leh bawk ang. Hei bakah hian talent phochhuahna, lâm thiam rual fuankhawmna Got To Dance te, hnam lam chi hrang hrang phochhuahna Cultural Dance, Debate (Mizo and English), Quiz, Essay Writing (Mizo, English, Hindi), Photography, Cultural Dance, Poetry Writing (Mizo, English, Hindi), Fun Zone, E-Gaming, Varsity Miss, Tiger 5, 3 vs 3 Basketball, Slogan Writing te a ni. Chhimtute tan MZU Multipurpose Hall kawtah food court buatsaih a ni bawk ang.

Vibrio tawp zan hi Inferno tia hman ṭhin a ni a, he hunah hian zaithiam leh band ṭha ber ber an inlan ṭhin. Nikum khan Boomarang leh Triau Trackx te an che a, hei bakah hian Varsity Miss thlan a ni bawk.

MZU-in kut an neih hi a tirah chuan Inferno tih a ni ṭhin a, zan khat chauh hman a ni ṭhin. Amaherawhchu hun a kal zel a, zirlaite leh mipuiten an hlut tial tial a, kum 2013 aṭang khan Vibrio tia thlak a ni a, tunah chuan zan khat chauh hun hmang ṭhin khan ni nga chhung an hmang ta. A tawp ber zan hi Inferno tiin an la ko zui zel thung.