Zayn Malik hi tunge?

One Direction member ṭhin, One Direction member zinga star-tu ngah ber ang hiala an chhâl, Zayn Malik hi tunlai chu khawvelin a buaipui. One Direction a chhuahsan hnuah press miten a chanchin an ûmzui nasa hle.

A hming tak chu Zain Javaad Malik a ni a, England-a Bradfort-a piang leh seilian a ni. A pa hi Yaser Malik a ni a, British Pakistani a ni a, a nu hi Tricia Malik niin English pangngai a ni thung. Amah hi sakhuana lamah chuan Muslim a ni. Unau pali an ni a, a upa ber dawttu a ni a, mipa awm chhun a ni bawk. Zayn tih hi Arabic ṭawng Zain a ni a, a awmzia chu 'mawi' (beautiful) tihna a ni. Malik tih pawh Arabic tho a ni a, 'Lal' tihna a ni.

X-Factor to 1D

Kum 2010 khan, kum 17 mi chauh niin The X Factor-a tel turin Manchester-ah audition-ah a tel a, a tlang chho a; hemi ṭum hian Mario hla Let Me Love You hla a sa. Round dang atan a tlang a, mahse The X Factor final round erawh a thleng zo ta lo.

Nicole Scherzinger leh Simon Cowell te chuan zaithiam an ti si a, hmalam hun êng tak neiin an hria a, tichuan amah, Zayn Malik leh The X Factor-a final round thleng zo lo dang - Harry Styles, Niall Horan, Liam Payn leh Louis Tomlinson te nen kokhawmin, group an siamtir ta a ni. An group chu a hmingah One Direction phuahin khawvel hriatin an rawn lar ta a ni.

A mimal thil

Malik hian khawvel hriatpuia ngaih­zawng a neih langsar chu Rebecca Fer­guson a ni a, ani hi X Factor-a contes­tant tho a ni. An inzui viau emaw kan tih laiin an inṭhen a, a hnu lawkah tuna a ngaihzawng, Perrie Edwards nen hian an inngaizawng zui. Malik hian Edwards hi a duh hmel hle a, tunah hian inhualna a siampui tawh a, nupuia neih ngei pawh a tum hmel hle.

Muslim a ni a, mahse Muslim nuna a nun lem loh avangin Muslim conser­vative-te chuan an sawisel nasa ṭhin hle. Pakis­tan thisen kai a nih avangin cricket a ngaina hle a, Pakistan chu a ṭan ber a ni. England-a awm a nih avangin football pawh a nunah a lian hle a, a ṭan ber chu Manchester United a ni.

A ran ngainat ber chu zawhte a ni a, tunah hian pahnih - Lolo leh Lily tia a koh a vulh mek. Ramsaa a duh ber chu sakeibaknei a ni thung. Arsa a ngaina hle a, hmeichhe lama a duhzawng chu hmeichhe fing fel tak a ni. Hmun sang, in chhawng sang tih velte a hlau a, thim a ngaina lo hle bawk.