Khiangte Construction Ṭhazual Lengzemah Mendal leh Smiley an langsar

Khiangte Construction Ṭhazual Lengzem chart tharah tleirawl lama tla na tak, Mendal leh Smiley te an langsar a, an hla 'Kum za' chuan chart chung ber dinhmun a luah. An single chu Top 10-ah an lanpui thei ve ve bawk.

'Kum za' hi Mendal leh Smiley ten an phuah dun niin, music leh recording hi Smiley kut chhuak a ni thung. Music video hi Osiama Pictures siam a ni, Joshua Construction in a sponsor a ni. A hla thluk a mawi a, mipain a hmeichhe duhzawng, a pawnlam lan dan ringawt aia a nun zemawi a ngaihhlutzia an rawn pho lang a, a hla thu pawh a him tawk hle. Music video pawh a hmuhnawm hle.

Pahnihnaah Projek_Liantluang X Lalhmangaihzuali (nunu-i) Ft. Smiley 'I par dun ang' a rawn lang a, Projek_Liantluang hnuaia hla tih chhuahte hi chart hmasa lamah te pawh kan lo hmu nual tawh a ni. Rinfeli Khiangte 'Duh te'n ka chawi' tih chu chart hmasa lamah No 9 aṭangin No 3-ah a rawn chho a, Mendal chuan a single 'An thleng pha lo' chu No 4-ah a lanpui bawk, Mizo folk singer kan neih ṭhat, Marina Vanhriatpuii Varte 'Aitenawn Par' chuan Top 5-ah a lang pha bawk a ni.

R. Lalruatkima pawhin hma a rawn sawn chho a, hetih lai hian Top 10-ah rawn lang thar an awm nual. Smiley chuan a single rawn lanpui ve bawkin, ani bakah Rosalind Khawlhring, Zothana ft Zodini leh Asanga Project ft Fawni Ralte te chu ṭhazual Lengzem chart-ah an rawn lang.