Zorock A HLUI LO Aizawla rawn luh a tum

Zorock vanglai hre pha lo kan tam tawh mai thei a, hmân a ni ve tawh a, mahse kha Zorock kha tunah pawh a la hlui lo. Music video a buaipui mek a, hunrei vak loah hi chuan kan hmu thei ngei ang.

Zorock tia kan hriat lar, Rosangliana hian music video thar pahnih a buaipui mek a, hei bakah hian hla eng emaw zat chu a nei tawh a, hengte pawh hi video-ah chantir thuai a nih a beiseiawm. A buaipui mek pakhat hi 'Chhinlung Chhuak' tih a ni a, hnam inpumkhatna lam hla a ni. Pakhat dang hi 'A thar zel ṭhin' tih a ni a, hmangaih em em leh duh ber ṭhen tâkte hla a ni a, mitthi tawh emaw, ṭhian ṭha emaw a kawk thei ang.

A music kalphung tur chung­changah, "An pahnih hian rock music lam ve ve a ni ang," a ti. Zorock-a chuan, "Chhinlung chhuak' tih hlaah hian a intro leh a tawp lamah Mizo taka kalpui a ni ang a, khuangpui leh khuangte, darbu leh seki te hman a ni ang. A bak hi chu a rock leh viau ang," a ti. A hla pahnihte hi April thla hi peih hman a inbeisei.

A hna aṭanga a chawlh hnuah Mizoramah Zorock hi a rawn chuang chhuak nghal a, tunah hian Kolasib-ah a awm mek a, Aizawla chuan chhuah a, inbel dan a ngaihtuah mek. "Kolasib hi ka inti khua viau a, ka fanu pakhat pawh pasal neiin a awm tawh nghe nghe. Amaherawhchu music hi chawlhsan mai ka tum rih si lo a, music khawvela ka ṭhian ṭha ber ber, ka thawhpui leh ka ngainat tak tak, ka hmelhriat tam ber hi Aizawla awm an ni a, ka tan chuan thil a awlsam phah hle dawn a ni," a ti.

Music video a siam mek a, hla eng emaw zat a nei leh tawh bawk a, mahse album erawh chu a tin tawh vak lo. Music video-a siam a, tihchhuah hlek hlek a tum deuh ber tawh. A album, Zorock volume I, II leh III thleng khan a hunlaia Zorama album hralh kal ber a ni a, khatiang hunlai ang khan tunah chuan album hralh a harsa ta. Concert pawh a hunlai angin boruak a ṭha tawh lo. A vanglaia a concert kha tun thlengin Mizorama Mizo band mal emaw, mimala concert ropui ber a la tihngam ang. AR Lammual khat tlatin mipui an pungkhawm a ni.