Swift leh Sam Smith te an langsar

May 17-a Las Vegas-a sem tur, Billboard Music Awards nomination list tihchhuah a ni a, Taylor Swift leh British singer Sam Smith te an langsar hle.

Swift hi category 14-ah zet a hming a lang a, Smith hi 13-ah a lang thung. Billboard Music Awards-ah hian category 41 lai a awm a ni. Anni pahnih tih loh, category pakhat aia tama lang zingah Meghan Trainor, Pharrell Williams, Ariana Grande leh Iggy Azalea te an langsar viau bawk.

Billboard Music Awards hi Ludacris leh Chrissi Teigen te an host dawn a, Ludacris hi chu tawnhriat nei tawh a ni a, Teigen thung erawh a vawi khatna a ni. Ludacris chuan, "Thurawn pek a ngai lo reng reng a, a zei sa a, a ngaihtuahawm loh lutuk," a ti. Awards sem zanah hian Fall Out Boy an zai ang a, Wiz Khalifa pawh a perform ang.

Billboard Music Awards hi kum 1990 aṭanga sem ṭan kha a ni a, a langsar lutuk ngai lo. Kum 2011 aṭang khan khawvelin he award hi a ngaiven viau ṭan a ni.