Cricket player te car

Indian Premier League-ah i hmu ṭhin a, an hming leh an khelh dante pawh i hre viau mai thei a, mahse eng motor nge an khalh ṭhin tih lai tak erawh hi chu i hre chiah lo mai thei. IPL player ṭhenkhat car khalh ṭhin hi bihchiang dawn teh ang.

Suresh Raina, Chennai Super King-a mi hian Porsche BoxsterS a khalh ṭhin. 3.4 litre flat engine a nei a, a bhp hi 326 a ni a, 7-speed dual-clutch PDK a nei bawk. A rawng hi a eng a ni a, a nalh a, a chak a, a sum lakluh pawhin a phu hle.

Virat Kohli hi a bialnu hmelṭhatzia leh chhiat lohzia chauh i hria a, a car chanchin erawh i hre lo mai thei. Audi R8 V10 a nei a, ani hian German car-ho hi a ngaina riau a ni. A engine hi 5.2 litre V10 niin, a torque hi 540N leh, a bhp hi 541 a ni. A chak hle a, tlân chhuak dawn ta se, second 3.6 chhung lekin darkar khata Km 100-a chak a thleng hman. A top speed hi 314 Km/h a ni.

Chandigarh lamin an ṭan em em Yuvraj Singh hian Lambhorghini a ngaina a, tuna a khalh lai mek pawh hi Lamborghini Murcielago a ni. 6.5 litre V12 engine a nei a, 632bhp niin, a torque hi 660Nm a ni.

MS Dhoni hian Ferrari 599GTO a nei thung. Dhoni hi cricket player zingah pawh car a ngaina uchuak bik hle a, car eng emaw zat chu a leikhawm a, bike pawh a lawm a, a ngah khawp mai. A bike kawl sawi daih ila, kan awh em em ṭhin, Ducati 1098, Confederate Hellcat X132, Kawasaki Ninja ZX14R, Harley Davidson Fatboy, Yamaha YZF600 Thun­der­cat, Yamaha RD 350 te hi a ga­rage-ah a dah!

Nikuma IPL-ah khan, Chennai Super Kings team-te chu Delhi aṭangin Jaipur-ah Rajasthan Royals nena an inkhelh zawhin an kal a; hemi ṭum hian Dhoni hi thlawhtheihnaa haw ve loin, a Confederate Hellcat X132 hmangin a inkhalh haw!

Harbhajan Singh hian Hummer H3 a nei. Spinner ṭha mi hi hi MS Dhoni dawta India mi zinga Hummer nei hmasa a ni. H3 hi 3.7 litre niin, a bhp hi 242 a ni. Hei bakah hian Ford Endeavour a nei bawk.