Ruby Rokhum lengzem hla hmasa ber zaninah

Kum 2014 bawr vela  Gospel hla saa kan hriat lar ṭhin Ruby Rokhum chuan hla thar a tichhuak dawn a, a hla hawi lam erawh a thlak hret dawn thung.

Kum eng emaw zat phai lama a awm avanga thawm a neih loh hnuah Ruby Rokhum chuan hla thar 'Khawnge ka di' a tichhuak dawn a, MDM library lamah dahlut tawhin zanin hian Zonet lamah ngaihthlak theihin tihchhuah a ni dawn.

He hla hi Tetea J leh Siamsiami Chawngthu tihchhuah niin Lal K Sailo chuan Music leh recor­ding a buaipui a, music video chu RDS Shots kut chhuak a ni thung. 'Khawnge ka di' hi Ruby Rokhum lengzem hla hmasa ber a ni dawn a, social media lamah chuan video teaser hmuh tur a awm tawh a, thlira ngaihthlak a manhla dawn hle. Ruby chuan a hla thar tur chu a 'cool' dawn hle tih sawiin, inṭhenna lam hla, a hmeichhia zawkin a rilru nat zia a puan chhuahna hla a ni dawn, tiin a hla thar tur chungchang hi Vanglaini a hrilh.