November-ah Film Fest & Mizo Film Award

Mizo film industry-in kawng hrang hrangin hma a sawn ve mek zel a, hmun danga an tih thinte pawh kan tual zawlah chhim tur a awm ve ta zel. November thla hian film lama chawimawina ngaihhlut Mizo Film Award pawh sem a ni leh dawn a, hemi rual hian a vawi khatna atan Film Fest 2024 buatsaih a ni nghal dawn bawk.

Mizo Film Industry tihhmasawnna kawnga hma la mektu, Entertainment Society of Mizoram (ESM) hmalaknain Film Fest leh Mizo Film Award hi buatsaih a ni leh dawn a, ni hnih a awh ang. Mizo Film Award hi kum 2021 aṭang khan kumtin hlawhtling taka sem chhoh a ni a, kuminah pawh changtlung zawka buatsaih leh tum a ni.

Mizo Film Award 2024 hian September 2023 leh October 2024 inkara film chhuakte a huam dawn a, film 30 chuang zet a awm der tawh. Film chhuak a tam avangin award dawngtute tan pawh a hlu zual dawn hle.

Film Fest erawh a vawi khatna tur a ni dawn a, inbuatsaihna pawh ngawrh taka kalpui chhoh mek a ni. Film Fest 2024-ah hian - Documentary, Feature leh Short Film te screen tum a ni a, film siamtute leh a changtute tana hlawk thei ang ber turin ruahmanna siam a ni bawk. Film Screening bakah hian film lama mi thiam bikten zirtirna an pe dawn a, a duh apiang tan chhim theih a ni ang. Film industry luhchilh mek leh luhchilh tumte tan a pawimawh hle dawn a, zawhna leh chhanna hun a awm dawn a, Mizo Film Industry dinhmun sawi zaunate a awm dawn bakah, hmasawn ngaihna kawng hrang hrangte sawi ho a ni bawk ang.

Film Fest 2024-ah hian mipui dawr theih turin Mizo ten movie app kan neih ṭhat ber berte an inpho chhuak dawn bawk a ni.