Ṭhazual Awards Nomination list an tichhuak

Zonet-in a buatsaih tur Ṭhazual Awards chu kalpui mek a ni a, tunah hian nomination list puan chhuah fel a ni ta.

Mimalah chuanTBC Zaithan­puia category pahnihah a lang a, Essy pahnihah a lang bawk. TBC leh Essy te hi Roro Polymers Best Music Video-ah an inel dawn. He category-ah vek hian Mawitei a lang bawk a, Mawitei hi National Business Enterprise Best Female Artist-ah a lang bawk.

Ṭhazual Music Awards hi kum 2014 chhunga Ṭhazual top 10, Gospel leh lengzema mite aṭanga lak chhuah leh thlir an ni. Category pasarih siam a ni a, category tina winner hian Rs. 15,000 zel pawisa faiin an dawng ang a, trophy an dawng tel bawk dawn a ni. Mipui vote-a thlan a ni dawn lo a, selection commitee an awm a, chung mite chuan kum 2014 chhunga Ṭhazual chart-a an chet dan aṭangin an lo thlir ang a, an thlang chhuak dawn a ni.

Nomination Committee, mi pangaten Ṭhazual chart-a an awm dan hrang hrangte uluk taka en a, thlir chungin category tinah mi panga an thlang chhuak a, heng thlan chhuah sate hi Selection committee, mi 27 te chuan uluk taka thlirin an thlang chhuak leh a ang. Ṭhazual Music Awards hi kum tina sem tura ruahman a ni a, music video tihhmasawnna, zaithiamte zinga inelna ṭha leh hmasawnna a awm theih nana siam a ni. Tunah hian category pasarih chauh awm mah se, kum dang zelah chuan category hi tihpun zel tum a ni a, ruahmanna hmasaah chuan Best Duo/Group te pawh telh belh leh a la ni ang.

Ṭhazual chart hi kum 2012 aṭang khan tihchhuah a ni a, chart hmasa ber hi December chawlhkar vawi thumnaah tihchhuah a ni a, Fakna hla bik niin, Andrew Laltlankima hla, 'Min hmang ve ang che' tih chuan pakhatna a hauh hmasa ber a, Maggie hla 'Immanuel' chu pahnihna niin, Judith Lalremruati 'Nunna Buah' tih chu pathumna a ni. Lengzem bik hi December 24, 2012-a tihchhuah chu a hmasa ber a ni a, Zualbawihi hla 'Thiamthu sût hmang' chu pakhatna a ni a, Zoramchhani hla 'Kan ngai a che' tih chu pahnihna niin, Apples hla 'Khauchher' chu pathumna a ni.