Box Office: "Beetlejuice Beetlejuice" thawm a ring

Film tlangzarh thar, dark fantasy comedy horror "Beetlejuice Beetlejuice" chuan thawm a rawn nei lian hle. USD mtd 110 zet la lutin, North American box office-ah September thlaa film tih chhuah zinga tlangzarh karah sum la lut tam ber dawttu a ni pha. Kum 2017-a chhhuak, horror adaptation "It" chauh a phak lo.

Tim Burton-a direct, "Beetlejuice Beetlejuice" hi Deetz chhungkuain chhiatna an tawh hnuah an Winter River-a an in hranga an kir leh hnua an thil tawn chungchang a ni.

A changtute pawh an langsar a, Michael Keaton, Winona Ryder, Catherine O'Hara, Jenna Ortega, Justin Theroux, Monica Bellucci leh Willem Dafoe te an inlan. He film hian internatioal-ah USD mtd 35.4 la lut bawkin, tlangzarh kara a sum hmuh chhuah hi USD mtd 145.5 a tling. Rotten Tomatoes-ah 77% critics leh 84% audience score niin, CinemaScore chuan B+ grade a pe bawk. Tlangzarh ni hian theatre 4,575 ah chhuahin, entu zingah 32% chu kum 35-49 inkar niin, kum 25-34 inkar 27% leh, kum 25 hnuai lam 24% an awm bawk.

"Deadpool & Wolverine" chuan a kar sarihnaah pahnihna a la hauh thei a, USD mtd 7.2 lak luh belh lehin, MCU film zingah sum la lut tam pasarihna a ni tawh. R-rated movie sum la lut tam ber a ni mek bawk. American president 40-na, Ronald Reagan biopic, "Reagan" chu pathumna niin, "Alien: Romulus" chuan North America-ah USD mtd 3.9 hmuh belhin palinaah a awm. Top 5-ah Colleen Hoover best-selling novel behchhana siam, "It Ends With Us" a lang bawk a ni.