Diljit Dosanjh tour: Minute 15 chhungin ticket nuai 1 hralh

Punjabi music sensation, Diljit Dosanjh-a'n India-a Dil-Luminati Tour a neih turah ticket booking hawn a nih aṭanga minute 15 chhungin ticket nuai khat an hralh chhuak.

October 26 aṭangin Delhi-a Jawaharlal Nehru Stadium-ah Dil-Luminati Tour hi a ṭan dawn a; Hyderabad, Ahmedabad, Lucknow, Pune, Kolkata, Bangalore, Indore, Chandigarh, leh Guwahati-ahte show a ni dawn a ni. Thawhlehni chawhnu aṭang khan mipui nawlpui tana hawn hmain HDFC Pixel Credit Card holder tan bik booking hi hawn hmasak a ni a, ticket man hi Silver (seated) Rs 1,499 aṭanga Gold (standing ) Rs 3,999 an ni. Ticket inchuh an tam avangin minute rei loteah a man pawh a pung chho hman nghal a, Silver hi Rs 1,999 leh Gold ticket hi Rs 4,999 ah a kai chho a ni. Minute rei lote chhungin Gold ticket phei chu an inchuh zo nghal. Vawiin chawhnu dar 1 aṭangin mipui nawlpui tan ticket booking hawn a ni dawn a, an hralh chhuah belh hnem hle a rin a ni.