MTV VMA 2024 : Video of the Year-ah 'Fortnight' thlang

2024 MTV Video Music Awards chu September 11, 2024 khan Elmont, New York-a UBS Arena-ah sem a ni a, Megan Thee Stallion chuan show hi a host a, a perform nghal bawk. Post Malone leh Taylor Swift-te thawhdunna, 'Fortnight' chuan Video of the Year award a dawng, he hla vang hian Best Collaboration an dawng tel bawk.

Taylor Swift chu award dawng hnem ber niin pasarih a dawng a, a award dawn zingah hian Artist of the Year leh Best Pop award te a tel. VMA hi 30 dawng tawhin, solo artist zingah dawng tam ber a ni mek.

Eminem chuan award pahnih, Best Hip Hop bakah Best Visual Effects a dawng. Newcomer Sabrina Carpenter chuan a hit, 'Espresso' chu Song of the Year a dawnpui bawk.

Blackpink member Lisa chuan 'Rockstar' hmangin Best K-pop award a dawng a, best group-ah South Korean boy group, Seventeen thlan an ni bawk. Award dawngtu zingah hian hmeichhia an tam zawk.

Katy Perry chu chawimawina ngaihhlut tak, Video Vanguard Award hlan a ni a, a hla pariat medley a perform nghal bawk. Video Vanguard Award hi a hmain Shakira, Beyoncé, Minaj, Madonna, Janet Jackson, Jennifer Lopez, Rihanna leh Missy Elliott ten an lo dawng tawh bawk a ni.