'Lerlawri' tlangzarh a ni dawn ta

Zote Entertainment film thar, 'Lerlawri (I ngam ngam ka ngam)' chu zanin dar 8 hian Vanapa Hall-ah tlangzarh a ni dawn ta a, Lersia Play-ah chhawp chhuah a ni nghal bawk ang.

He Film hi nula leh tlangval, mawlmang taka an in hmangaihna zin kawnga hun kal tawh thil avanga an chhungte ve ve aṭanga buaina an tawh chhoh dan, buaina hmachhawn tura an in buatsaihna thawnthu hlimawm leh lungchhiat thlak lam a ni a, Mizo te rilrem thei ang ber tura buatsaih leh duan niin Mamit-ah an chang a ni. Zote Entertainment chuan an film buaipui tawha an la chai rei ber a ni tih sawiin, a landan mawlmang tak piahlama a hautak zia leh an beih nasat zia film director, Mike chuan Vanglaini a hrilh.

'Lerlawri (I ngam ngam ka ngam)' ah hian Mizo hmeichhe lemchan thiam kan neih ṭhat, kum 2023 leh 2024-a Best Supporting Actress leh Best Actress lo la tawh tu Ruthy Chenkual chu a changtunu ber a ni a, he film aṭang hian Mizo film actress man to ber dinhmun pawh a lo luah tawh a ni. Hriatpuia Kion, Joel Pachuau, Machhungi, Parteii (lerlawri tia hriat lar) bakah VL Hmuaka te an inlan dawn. Script hi Tei Zote leh Mike-te ziah a ni a, Mike bawkin direct lehin, Biaka St. Photography chu director of photography a ni . Lersia Play hi co-producer a ni bawk.