Famkimi Kawlni Music video thar nen a rawn lang leh e

'Nghilh zai rel ang' tih hla hmanga pakhatna a hauh hnuah Famkimi Kawlni a reh rei lo. Music video thar a siam peih leh tawh a, Ningani zan aṭang khan cable TV-ah hmuh theihin chhuah ṭan a ni.

Famkimi Kawlni mu­sic video thar hi 'Ka ngai em che' tih a ni a, Pek­a Kawlni, Vaivakawn phuah a ni. A hla hmasate nena khaikhinin tlemin a dang­lam deuh hlek a, a flow pawh a danglam deuh. Mizo tak si a ni a, acoustic gui­tar leh tabla nen chauha rem, music phui ṭha tak si a ni. A music a changkang a, Thang­bawiha kutchhuak a ni a, ngaihthlak pawh a man hla.

He hla 'Ka ngai em che' tih hi Peka Kawlni hian Famkimi Kawlni sak tur hrim hrima a phuah a ni.

Tuna mi hi Famkimi music video pathumna chauh a ni a, mahse Famkimi hi music khawvelah chuan a thleng sang hle. Kum 2013 khan Min Hersan Si hla hmangin Zonet Ṭhazual - Lengzemah pakhatna a lo hauh tawh a, hei hi a music video hmasa ber a ni. Hemi hnu hian 'Nghilh Zai Rel ang' tih hla a rawn tichhuak leh a, nikum September thla khan pakhatna a rawn hauh a, he hla hmang hian ṭum hnih lai pakhatnaah a awm.

'Ka ngai em che' music video hi March thla aṭanga a buatsaih ṭan kha a ni a, a uluk a, amah pawh a hah hle. "Han siam vek vek chuan en nuam, ṭha, hmuhnawm kha ka duh si a, theihtawp ka chhuah a ni. Tuna ka video hi ka bei nasa a, chaw pawh ka ei mumal hman lo a, ka damloh phah hial," a ti. An siam lai hian rokhawlhna tam tak an nei a, power supply mumal lo avanga ni khat tawp tawp ṭhulh an nei nual niin a sawi bawk.

A video thar hi a beisei san leh san loh zawhnaah, "Ka beisei ve deuh tho mai. Ka music video hmasa ber, Min Hersan Si kha Ṭhazual chart-a a lan ka ring pha lo hrim hrim a, mahse mite min duhsakna avangin pakhatnaah a awm ve ta hlauh. Nghilh Zai Rel Ang tih pawh kha ka beisei ngam lutuk lo nachungin a rawn thleng sang a, pakhatna a rawn hauh leh. Khangte ka ngaihtuah khan, leh tuna ka video thar ka uluk a, ka hahpuizia ngaihtuah hian, a hmaa mite thlen chin chu thleng ve thei mai turah chuan ka ngai," a ti.

Famkimi hian tunah hian hla neih sa a nei nual a, recording tih zawh vek tawh pakhat a nei bawk. A record zawh tawh hi hip-hop lam rawngkai a ni a, ngaihthlak a chakawm viau tawh. Kumin 'ber thla lam hiam video-a siam leh a tum.