Fashion Fiesta

Kan duh emaw duh lo emaw mit a ṭhat miau loh chuan bun a ngai tlat. Duh thlan theih tlem te kan neih chu lens nge glass vuah, lens vuah tur chuan tlema mi chengvawng, thil ti thlip thlep mi nih a ngai ngei ang le. Chutah keini ti thlip thlep ta lo chuan a vuaha vuah kha a awlsam ta et mai a ni. A bun a bun lam chi te nen, awlsam zawn a ngaih piah lamah, inlak tunlaina/ fashion pakhat a ni ve tlat. Heng nerd/geek looks kan tih ho, ti-nerd leh geek-tu chu he glass ngei mai hi a ni tlat. Eng ang pawhin nerdy incheina ho hi inbel tum mah la, glass tel lo chuan a kim lo tlat. Chuvangin tunlai changkannain a ken tel pakhat, kan naupan laia vuah kan hlauh em em, ṭhian ṭhenkhat ten loh theih loha an vuah, fiam nan leh nuihzat nana kan lo hman fo, tarmit ngei mai hi belchiang dawn teh ang. Dik tak chuan a tir lamah mit ṭha lote tana hmuhfiahna tura siam hi mit ṭha tan pawh incheina chi khat a tling ṭan tlat. Design hrang hrang, ṭial dan chi hrang hrang lah a tam a, a tung, a sawl, a bial nen lam, chi hran hi a tam lutuk a, thlan mai hi a harsa tlat. Chuvang tak chuan inhmeh leh hmeh loh zawng, kan hmelhmai pian a zirin a awm thei a ni. Kan duh duh kan vuah theih rualin kan hmel pian mil tur thlan thiam a pawimawh. Kan landanah pawh kawngro tam takin a su ngei ang le.

BC 4 aṭanga AD 65 inkar khan Roman lehkhabu ziak ṭhin Seneca chuan “All the Books of Rome" tih lehkhabuah chuan Tarmit chungchang a lo ziak lang daih tawh mai. Kum zabi 13-na lai vel bawr chhoah khan Tarmit mit pakhat chauh nei (Single lens) ang chi ho kha thing leh Ramsa ki aṭangtein an lo siamchhuak daih tawh a ni. Tunlaia Tarmit kan hmuh ang chi ho, mit pahnih nei, hnar ngula innghat, benga inzep kan hmuh hmasak theihna ber chu 1352-a Tommaso Da Modenas-a lemziah pakhatah a ni a, chutah chuan Puithiam pahnihin lehkhabu an chhiar lai lem a chuang a, chutah chuan puithiam ten Tarmit an vuah lai chu tihlan a ni. Kum 1600-chho khan Spanish kut themthiamho chuan Tarmit benga innghat ang chiho hi an lo siam chhuak daih tawh mai a. A tirah chuan thing leh saruha siam ni loin silk Ribbon leh hruihrualte hmangin benga thlunbeh theih turin an siam ṭhin a, kum 1730-a lo nih meuh chuan Tarmit chu Glass-hmanga siam ni mai tawh lovin plastic leh polycarbonate-te hmanga siam chhuah a lo ni ta a. Chumi hnu kum zabi 18-na chhoah phei chuan Sunglass kan tihho ang chi hi James Ayscough chuan a rawn siamchhuak ta nge nge a ni. Tarmit fawng nei (Lorgnettes) ang chiho hi chu 1780-chhoah khan English nu hoin intihhmuhin, Tarmit pangngai kha tar deuh hlek vuah tura ngaihna an neih ṭhin avangin inchei nan tak an hmang chho a. 1800-chhoah phei chuan a lar hle a ni. Inchei nan tak taka hman anih chhoh ṭanna chu 1939-1945-Indopui II-na lai vel bawr chho khan English mi Sir William Crooks chuan indonaa Pilot-te tan vuah nuam leh awlsam a siam chhuah aṭangin khawvelin tunlaia Tarmit kan tih angho chi, hnar ngula innghat, benga inzep ang chi hi a lo hmelhriat ṭan ta a ni. 1970-ah meuh chuan Hollywood leh film industry lamah chuan kan milar ten an intihhmuh nasa tawh hle. Tarmit lian pem pum (over size) kan tihho ang phei hi chu Jacqueline Kenedy Onassis-in a rawn vuah meuh chuan Tarmit frame dangdai leh danglam-ho Designers-ten an insiamchhuah siak ta a ni. Hmuhfiah nana siam kha incheina tlanglawn leh pawimawh ber a ni ta.

Zir mite chuan mihring hmel pian hi chi liin an ṭhen hrang ṭhin a, a bial (circle) ho bikah hi chuan chal, biang leh khabe a inrual tlang a, a bial deuh pap ṭhin, a bikin chum leh thau lampang ho hmel pian a ni tlangpui ṭhin. Heng hoah hi chuan rectangle emaw square kan tih ho shape, tlema hmel pian siam thei tur tarmit vuah a ṭha. Bial tawh sa nak laia a bial pap vuah chu ilang mum tel mai ang. Chuvangin tlema sawl deuh lam thlan a ṭha.

Oval face kan tih ho, artui pian ang deuh chal arh lutuk lo, hmai tlang sang chho deuh vah, khabe zum leh deuh sat maite hi hmai tlang lawn tak leh thil inhmeh awl tak an ni. Heng hmai pian ang hoah hi chuan glass kha kan biang ki lai ber aia lian hretin sei se, chuan, eng ang pian pawh hengah hi chuan a nalh tlangpui. Mahse te lutuk lam erawh an mawipui lem lo ang. Heart kan tih ho hi chu a hming aṭang hian a hriatthiam awm mai a, love (hmangaihna) tih lan nana kan hman heart shape/ thinlung pian ang sawina a ni mai, a awmzia chu chal a arh a, hmai a hlai deuh phak a, chutah khabe a zuih zum deuh a. Heng hmel pian angah hi chuan chal leh biang a hlai deuh avangin hmai a hlai lai ber aia lian loin hmel pian tikhuangrual tur ang tarmit frame tê vuah hram hram a ṭha. Chutah le, hmel sawl/ tung ho sawi nana kan hman ṭhin, hmel tung khabe ruh lai lian lam deuh, heng square bikah chuan a bial lamte bun a ṭhain hmai tung lutuk tur a veng a, a chi phian mai thei. Heng hmel pian bikah chuan hmel hriam ti lang mam turin rectangle pian ang chi ho, hlai lutuk lo vuah hram hram a ṭha. Heng bakah hian tarmit kan tih chhungah hian hmuhfiah nana kan hman mai ni lo, chhuahvah nikhuaa nisa laka min veng thei tur angah te heng tarmit pian ka sawi ang chi hi ilo vuah ṭhin dawn nia.

Tluangpuii Hmar
Instructress
Vakiria Institute of Fashion Technology