Josephine Lalawmpuii hla thar 'Kuah Rem Loh Di'

'Khep Khep Mai a' tih hla dangdai tak hmanga Zoram mipui min awitu Josephine Lalawmpuii chuan hun eng emaw chen hla thar a neih loh hunah zanin hian hla thar a tichhuak dawn.

Josephine Lalawmpuii hla thar hi 'Kuah Rem Loh Di' tih a ni dawn a, zanin dar 7-ah hian EME YouTube channel-ah thlira ngaihthlak theih turin tlangzarh a ni dawn.

'Kuah Rem Loh Di' hi Ṭha-i Sathing phuah a ni a, a thluk chu Valte (Foster Records) siam ni thungin EME Records (Thangbawiha) chuan music leh recording a buaipui thung a, ani hian Josephine-i hla thar hi a produce nghal dawn bawk a ni.

'Khep Khep Mai a' nen kha chuan a danglam dawn hle a, hla lungkuai lam a ni daih dawn thung a, lam rem lam vak chu a ni tawh dawn lo niin a lang. Duktak, neih theih si loh, theihnghilh theih si loh neih hrehawm zia tarlanna hla lungkuai tak a ni dawn.

Josephine-i hlate hian YouTube lamah thlira ngaihthlak an hlawh hlawm hle a, nuai hnih chuang thlirtu a nei fur hlawm. 'I lo ni reng si' khan thlirtu maktaduai dawn a nei tawh a, Jt Production nena an hla  'A kim Mahna' chuan thlirtu nuai riat chuang nei tawhin 'Khep Khep Mai a' phei chuan thlirtu maktaduai 1.8 chuang a nei tawh a ni.