MSL Dance Battle Vawi khat nan inhnehtawk kan hmu

MSL halftime Dance battle chuan a tawp lam a hnaih tawh hle a, dance crew tinte he MSL chhung hian vawi 5 ṭheuh lâm tur an ni a, TBL Lay Up leh Vikings Diamond Shark ten an lâmna hnuhnung ber, a vawi nganaah ve ve, chak zawk awm lovin an in-draw. Hei bakah hian BCA Home crew Emerge leh Tuikual South Away crew BGMX te kar hmasa chhung khan an chak bawk. Dance crew te hian vawi khat vel ṭheuh lâm an nei tawh a, final an luh ngei theih nan an lâm hnuhnung ber turah ṭha lehzualin theih tawp an rawn chhuah a ni.

Thawhlehni zana Mission Veng Vikings leh Tuikual South B.C inkhelah Vikings Home crew Diamond Shark leh Tuikual South Away crew Myztic Movers te an intum. Myztic Movers te hian costume lam an rawn bei nalh hle a, thla (wings) leh hmai kawr te nen, mahse an lâm execution a ṭhat tawk loh avangin chak lo zawkah an ṭang ta a ni. Diamond Shark te hian an crew signature, Bollywood leh ram ngaih kawr nen an rawn che leh a, an rual ṭhain an athletism ṭhat em vangin an rawn chak ta a ni.

Ningani zana Zarkawt derby, BCA leh Serpents inkhelah, BCA Home crew Emerge leh Serpents Away crew Monadikos te an inhmachhawn. Monadikos hi chak loh la nei lo an ni a, an kal tluang zel. Hemi zan pawh hian an rawn lâm ṭha leh hle a, tap dance leh Bollywood te an rawn telh a, mahse an choreography-ah BCA Emerge te an rawn hneh zo ta lo. Emerge hian an choreography ah theatrics te rawn telhin, hip hop hnuaia style hrang hrangte nen an rawn bei mawi hle a, entute lawm pawh an hlawh hle. An performance ṭha tak avang hian an chak ta zawk a ni.

Zirtawpni tlaia Tuikual South BC leh Chaltlang Ryders inkhelah, Tuikual South Home crew BGMX leh Ryders Away crew Crazy Bee te an rawn lâm. Crazy Bee hian an members rawn siksawiin a hmaa mipa hlang 4 ni ṭhin kha hmeichhe 2 an rawn telh thar a, mahse an performance a ṭhat tawk loh avangin rawn zia chho viau mah se an chak zo ta lo a ni. BGMX hian original concept ṭha tak nen, dangdai takin an rawn bei ṭhin a, an choreography solid tawk lo ṭhin mah se an team work a ṭhat avangin, chak zawkah an ṭang ta a ni.

Zirtawpni zana Mission Veng Vikings leh Khatla TBL hmuhnawm takah, Vikings Home crew Diamond Shark leh TBL Away crew Lay Up te an in-battle thung. Anni pahnih tan hian an battle hnuhnung ber ve ve a ni. An rawn ṭang dun hle a, a hmaa a an rawn lâm tawhnate ai ṭhain an rawn che a, a bikin Diamond Shark hian rin loh deuhin, an lâm hnuhnung ber aṭangin puahchah nan ni thum chauh nei mah se an rawn lâm ṭha em em. MSL chhung an crew lâm ṭhat ber ṭum a tih theih. A hmaa Bollywood ngawr ngawt ni ṭhin kha thlakin, performance hmuhnawm tak an nei. Lay Up hian heels sang tak rawn bunin, Jazz leh Hip Hop telhin an lâm thiamzia an rawn entir. Heels bun ringawt pawh hautak viau mah se movement har tak tak leh dance technique dik tak nen an rawn che. Judge te tan hriathiam a har hle, an tehna hrang hrang aṭanga an en hnuah, draw-a puan an ni. Diamond Shark leh Lay Up chu an awl tawh rih a, crew dang 10 te hian an chance la neihah a ṭha ber rawn ken tumin tunkar Ningani leh Zirtawpni hian an bei chho leh dawn a ni.