Nita Strauss-in ruihhlo tel loin Kum nga hun a hmang ta

Alice Cooper guitarist chhe lo tak, solo artist ang pawha hlawhtling tak  Nita Strauss chuan kum nga chhung ruihhlo tel loin hun a hmang ta.

September 5 khan Strauss hian social media-ah kum nga chhung ruihhlo a nghei tawh tih hi tarlangin hetiang dinhmun a thlen theihna tura a zinkawng a tarlang bawk a ni.

"Tunhmaa min hretute chuan kum nga chhung ruihhlo tel loa hun ka hmanna engtikah emaw ka lawm ang tih hi hria se chu an nuih a za zawk hial ang (an thil inlai an phuh ṭhawt hial mai thei). Engkim avang khan zu in a ngai tlat khan ka hre ṭhin. Thil ka lawmna a ni emaw, lusunna a ni emaw, hun hrehawm ka hmachhawn emaw, ni hrehawm tak ka hmachhawn emaw te khan. Intih hahdam leh nuihna atante leh ka ṭhian hmeichhiate nena chaw chhun kan ei ho emaw, mipa zinga Pathiannia football ka en emawte khan zu in tur maw ka ti ṭhin.

"Ka nun hi a inthlak danglam vek te ka hlau a, zu tel lo chuan keimah ka ni tawh lo ang tihte ka hlau ṭhin a, ka ṭhian hnaite ka hloh anga, thil dang daih ka ni ang tihte ka hlau ṭhin. Chung zawng zawng chu a thleng ngei a, mahse ka beisei loh lam zawngin a thleng thung," tiin Strauss chuan a zu nghei dan chanchin a tarlang a ni.

A tirah chuan a ngaihzawng nen an inkarah danglamna a thlen hmasa ber tih sawiin, an kara buaina a ziaawm a, rah ṭha zawk, inremna leh hmangaihna nasa zawk an nei tih a sawi. Ruihhlo a nghei hma kha chuan zing dar 6 thlengte bar-ah a hun a hmang ṭhin a, tunah chuan zing dar 6-ah thoin ni a hman ṭan tak tak hmain gym lamah hun a hmang ta zawk tih a sawi bawk.

Ṭhian tam tak a neih ṭhinte chuan an kalsan a, ṭhian rintlak leh ṭhian tak tak awmzia a hriat phah ta bawk tihte thlengin a sawi lang bawk a ni.

Khawthlang milar, a bikin rockstar zingah khuan zu leh ruihhlo dang ti ṭhin nghei leh ta an tam hle a, chung mite chuan kumtin hian an ruihhlo nghei champha a lo thlen hi chuan lawm takin an puangzar ṭhin. Khawvel puma milar, duh duh nei thei tam tak khuan ruihhloah hlimna a awm loh zia an zir chhuak ve chawk reng a, ruihhlo nghei chu inchhuanna atante pawh an hmang ve zawk ṭhin.

Nita Strauss hi a la upa lo a, kum 33 chiah a la ni. Chuti chung chuan a music career-ah tawnhriat a ngah tawh hle a, hmeichhe guitarist zingah chuan a ni aia lar sawi tur an tam lo hle ang.

Kum 2014 khan Orianthi thlakin Alice Copper guitarist kumhlun a ni ta a,  Jamie Christopherson, Critical Hit, Docker's Guild, FB1964, Metal Allegiance leh Kane Roberts-te pawh pui ṭhinin solo pawhin track tam tak a tichhuak tawh a ni.

Guitar World-in '10 Female Guitar Players You Should Know' a tihchhuahah phei chuan No.1 a ni hial a, Ibanez guitar company-in hmeichhe signature artist an neih hmasa ber a ni bawk. Guitar magazine lar tak tak Guitar World leh Guitar Player-ahte pawh a chanchin vawi duai lo  tarlan ni tawhin nula a la ni bawk.