Social media-a content him lo veng turin Meta, Snapchat leh TikTok thawk ho dawn

Social media platform-a mahni intihhlum leh intihnatna lam hawi content awm ṭhinte man chhuah leh, veng turin Meta, Snapchat leh TikTok te an thawk ho dawn.

An hmalakna hi 'Thrive' tia vuahin, Mental Health Coalition-in a enpui ang. Platform pathumte hian hetiang content awmte chu hriattirin, action lak zui a ni dawn a ni.

Meta chuan, "Thrive kaltlang hian tech company-te chuan suicide leh self-harm content chungchangah dan bawhchhiate chu an rawn share zel thei dawn a, hei hi company dang chuan an platform-ah dah a ni em tih lo chhuiin, action an la nghal thei dawn a ni. Meta chuan hemi atan hian technical infrastructure, Tech Coalition Lantern program tana technology kan pek ang ka pe dawn a, hemi hmang hian content-te hi him takin share a ni ang," a ti.

Apps pathumte hian user-te chu mental health chungchang sawi ho in an ngaihdante an share a phalsak a ni. Mahse hemi rual hian mahni intihhlum leh intihnat lama mi dangte phurna siamsak thei, graphic leh material dangte chu a lo dang zel dawn a, hei hi Thrive programme hian a lo thlurbing dawn a ni. Data an inhrilh tawn chungchangah hian content chauh a ni dawn a, account leh mimal information te a tel dawnlo tih Meta chuan a tarlang bawk.

Social media kan hmang uar zel a, a ṭangkaina tam tak a awm rualin, ṭhalai zingah depression leh mahni intihnatna thleng tam chho zel chu social media nen hian inzawmna neia sawi a ni bawk. Hei vang hian platform pathumte hian hemi venna tur atan hian hma an la dawn a, thawhpui dang pawh an neih zel beisei a ni.