MZU festival - Vibrio 2015 ṭan ta

Mizoram University festival, Vibrio 2015 chu nimin khan Multipurpose Hall-ah Dean Students' Welfare Prof. Lalnuntluanga'n a hawng a, Festival ṭan nghal a ni. April 17 thleng a awh ang.

Hawnna inkhawmah DSW chuan anti-ragging university a nihna chhawm nung zel tur leh smoke-free zone a nih theih nan ṭan la zel turin zirlaite a chah.

Festival hmasawnpui zel tur leh midang te tana entawntlak inelna thianghlim kalpui chu ngai pawimawh turin zirlai te a chah bawk.

Festival ṭan ni hian inelna chi thum- debate, 5 on 5 Football leh E-Gaming neih nghal a ni a, 5 on 5 Football-ah tel an ṭhahnem vangin 1st round khelh zawh a ni a, vawiiah khelh chhunzawm leh a ni ang.

E-Gaming-ah Street Fighter X Tekken khelh zawh a ni a, pakhatna chu Lalrindika, Mission Veng a ni. Debate (English)-ah Amos Lalhruitluanga, English Department chu pakhatna a ni a, Mizo debate-ah Lungtiawii, Mizo Department chu pakhatna a ni.