Hmingtea hla thar thung Reuben-a nena an zaidunna hla chu

'Kan fak zel ang che' tih music video a rawn tihchhuah khan Zoram khawvela music video kalphung a rawn her danglam a, hip-hop style-a her rem a, dance crew-te nena music video siamin en leh ngaihhlut a hlawh phah. Kha music video tichhuaktu Hmingtea chuan music video thar a rawn tichhuak leh a, hetah hian tunlai rapper hlawhtling Reuben-an a pui, ngaihthlak a chakawm viau.

Hmingte-a music video thar hi 'Hnehtu ropui' a ni a, ama phuah a ni. Reuben-an a zaipui a, a hmaa mi ang deuh bawk khan lâm thiam rual kan hmu leh bawk ang a, amah Hmingtea ngei pawh a lâm lai kan hmu ang. Hmingtea hi lâm a thiam riau a, mahse a hranpa zir a ni lo. "Zirna hmunah emaw ka kal hran lo a, mahse ka tui ve a, dancer thiam tak takte nen kan inkâwm a, kan tiho ṭhin," a ti.

"Ka music video hmasa nen a inang ṭêp a, tun ṭumah hi chuan house music hman tel a ni. Naupang tê tê thlenga an tuipui, an zaipui a, an lâmpui theih tura buatsaih a ni," a ti bawk. Hmingtea hian hla phuah a thiam riau a, tunah hian hla 20 aṭanga 30 inkar vel zet a phuah ve tawh.

"A hla hi mihring nun beidawng loa hmalam pan tura fuihna hla a ni. Ka hla hmasate aiin a thleng sangin a ṭha ang em tih ka sawi thei lo a, Pathian thu thu a ni a, theihtawp chhuah a, a ṭha thei ang ber tura ka buatsaih a ni," a ti. Reuben kher a zaipui chungchangah, "Ani nen hian kan inkawmngeih a, kan tiho nasa a, chubakah tunlaia Mizorama rapper kan neih zingah chuan a ṭha ber niin ka hria," a ti bawk.

Mizo Idol-a a tel hnu aṭangin Hming­tea hian music video paruk vel lai a tichhuak tawh a, hei lo pawh hi hla neih sa chu a nei nual tawh. Mahse music video ang zawngin nge album ang zawngin a rawn chet chhuah leh ang tih erawh sawi lawk a harsa deuh. "Tuna ka music video hi han tichhuak phawt ila, chuta a hlawhtlin dan azirin album emaw ka buaipui tawh ang ka ti deuh. Hla neih sa ka nei nual tawh a ni," a ti.