Kuminah El Nino a thleng leh mek

Nikum khan Pacific tuipuiah El Nino a thlen avangin kumtluanin khua a lum deuh hlek a, kuminah pawh El Nino hi a lang leh. India Meteorological Dept chuan El Nino hian India rama ruahtui tlak dan pawh a nghawng leh ngei dawn tih a sawi.

Met dept hian El Nino thlen tur thu hi a puan rualin monsoon a lo thlirlawk chungchang chipchiar zawk a tichhuak a, El Nino inmûng leh thleng mek chung hian kumin bikah chuan fur ruahtui kan dawn dan a pangngai dawn niin a tarlang.

Australian Weather Bureau chuan El Nino hi thla thum chhung chu neutral range-in a awm dawn tih a puang a, hetiang a nih chuan thla thum chhunga India-in ruahtui a dawn tur chu a pangngai ang. Kum 1885 aṭanga kum 2005 chhunga khawchin chhinchhiahah, El Nino thlen kum zawng zawng za zela 90-ah chuan India hian ruahtui a dawn tur anga a dawng pha ngai lo a ni.

El Nino hi nikum pawh khan a thleng mah se, India Monsoon-ah erawh nghawng chhe tak a nei lo. Fur ṭan tir lamah ruahtui a tlem deuh nain, fur laihawl leh a hnuhnung lamah chuan a pangngai kan dawng leh tho. Amaherawhchu El Nino hian khawvel pumah khawlum zawng a nghawng a, nikum ang deuh bawkin, kumin hian a lum leh tura ngaih a ni.

Met Dept.-in khawchin a thlirlawknaah, tunkar chhung bik hian India hmarchhak, Bihar, UP khawchhak lam, Darjeeling bialahte scattered rainfall, ruahbing emaw, hmun ṭhenkhata sur, ṭhenkhata sur lo thleng thei turin a tarlang. Kar tawp lamah hian Hmarchhak bial bikah chuan ruahtui a insem rual (fairly widespread) tura ngaih a ni.