NRI-te aṭangin India-in sum a hmu hnem

World Bank-in a tarlan dan chuan India chu a ram mi, ram pawna awmte aṭanga sum hmuhnem ber a ni. Ram tam tak pawh an ram pawnah hnathawkin eng emaw zat an awm a, chung mitena anmahni ram chhunga pawisa an thawn let lehah India an tluk lo.

Kum 2014 chhung khan India mi, ram pawna awm ten an pawisa India-a an rawn thawn let leh zat chu dollar tluklehdingawn 70 zet a ni. Hetianga ram pawna hnathawkten anmahni rama sum an thawn let hi, ram ṭhang mek zingah chuan, kum 2015 chhung hian dollar tld 440 a tlin rin a ni.

Ram pawna hnathawk tura chhuakten an pan nasat ber ber ram chu United States, Saudi Arabia, Germany, Russia leh UAE te an ni. Ram pawna hnathawktu thawn chhuak hnem ramte chu India, China, Philippines, Mexico leh Nigeria te an ni.

Kum 2014 chhung khan ram pawna hnathawkten anmahni ram chhunga an thawn let zawng zawng hi dollar tld 583 a ni a, hei hi ram ṭhang mek leh ram changkangte chhiar tel vekin a ni. Heng zinga dollar tld 70 hi India mite an ni a, Chinese ten dollar tld 64, Filipino ten dollar tld 28 te anmahni ramah an thawn haw a ni.