Chart No.1 dinhmun Jaui tan chauh

Ṭhazual chart-ah roreltu thar an awm a, chu chu tudang ni loin Jaui a ni. Jaui 'I tan chauh' chu chart No.1 a ni a, Manuna 'Vawng reng nang e' chu pahnihna niin HT Lalthanzami 'Rauthla zun' chu pathumna a ni bawk.

Lengzem artist huhang ngah tak Jaui official music video thar ber 'I tan chauh' chu Ṭhazual chart-ah rei pawh a inlan hmain No.1 a ni der mai. Hope Music production kut chhuak hla Zonet lamah thlan hlawh ber a ni hi a mak lo, thla hnih chhung vel lekin YouTube-ah thlirtu nuai 2.6 chuang an awm tawh miau a. Music video a hmuhnawm a, Jaui zei zia kan hmu leh bawk nen, thlirtute mit leh beng a titlai tih a chiang a, chart-ah No.1 pawh a ni har lo reng a ni.

He hla hi spotify lamah pawh ngaih­thlak theihin a awm tawh a, Instagram music-ah pawh awm bawkin Jaui zai ngainatute chuan an story velah pawh an hmang uar hle. 

Pahnihna chu Manuna hla thar 'Vawng reng nang e' a ni a, chart hmasaah khan pangana a ni a, pahnihnaah a rawn invawrh a ni. Manuna music video hi a hmuhnawm ṭhin a, 'Vawng reng nang e' pawh hi a hla a nalh piah lamah music video a hmuhnawm lehpek hle a, dinhmun ṭha bera ding tur pawhin hmabak a nei eng hle.

HT Lalthanzami 'Rau­thla zun' pawh parukna aṭangin pathum­naah a rawn inhlangkai a, HT Lalthanzami hlate hian chart-ah an chet ṭhat ṭhin bakah YouTube lamah pawh thlir an hlawh ṭhin hle a, dinhmun ṭha lam a pan zel pawh hi a mak lo hle a ni.

Tunṭum Ṭhazual chart hi a 'hot' hle a, palina chu KR Robert-a 'Beiseina beidawnthlak' niin  pangana chu Awmtea Polymer 'I Phone kha la rawh' a ni. Anni bakah hian zaithiam langsar tak tak an la awm a, chung zingah chuan Ruatpuii, Fela Colney leh Rebecca Saimawii te pawh an tel.

1    Jaui     - I tan chauh

2    Manuna     - Vawng reng nang e

3    HT Lalthanzami     - Rauthla zun

4    KR Robert-a     - Beiseina beidawnthlak

5    Awmtea Polymer     - I Phone kha la rawh

6    Chhanhimi     - Hliamhnu hmangaihna

7    Ruatpuii     - A dawn phak lo 

8    Fela Colney & Temami     - Beisei bo

9    Rinṭhai ft Young P     - Duhlai Mama

10    Rebecca Saimawii     - Ka lung damna