Khiangte Construction Ṭhazual Gospel : Hma hruaitu Malsawmdawngzuali 'Ka mawina Isua'

Malsawmdawngzuali chuan ama hla phuah ngei, 'Ka mawina Isua' chu Khiangte Construction ṭhazual Gospel chart tharah pakhatna a rawn nihpui ta.

Mali hian he hla hi July 30, 2024 khan ti chhuakin, a thu leh a thluk hi ama phuah leh siam a ni a, music hi Dama Ralte kut chhuak niin, recording hi HC Recording-ah a ti a, video hi Lalrin_imv siam a ni thung. Ama hla phuah ngei mai a rawn sak larpui thei a, a hla thu hi a ṭhain a thluk a mawi a, midangten an chhuia an buk tlin loh te, nun beidawng tawhte tan Isua-ah famkimna a awm a, Isua chu kan mawina leh hlutna, kan beiseina awmchhun a ni tih a rawn puang chhuak a, ringtute tana ṭawngṭaina hla ṭha tak a ni.

Gospel band kan neih ṭhat, One in Christ chuan Ṭhazual chart-ah hla pahnih an lanpui a, 'Damna Kim' chu pahnihnaah awmin, 'I Pathian tawk turin inpeih rawh' tih chu paruknaah a lang bawk. Thawhlehnaniropuia pawhin hma a sawn zel a, 'Ni tla ngailo Zion Khawpui' chu No 3-ah a rawn lang a, Ablaze chu an dinhmun ngaiah la ding nghetin 'I thisen vangin' tih chu No 4-ah a la awm chhunzawm. Top 5-ah hian Angaihtei & Mama Hlonchhing 'Ka chawl ta' tih a lang bawk.

Ṭhazual Gospel chart-ah hian Electric Veng KṬP te an lang chhunzawm zel a, hetih lai hian Hlimhlimi, Cindy Lalthanpuii leh Dinsangi ft To Coda chu an rawn lang thar ve thung.