Hard Rock music video budget sang ber Guns N' Roses 'Estranged'
Online rock magazine lar Loudwire chuan Hard Rock music video zinga sum senna tam zual panga a tarlang a, Guns N' Roses 90's hit 'Estranged' music video kha budget sang ber a nih thu an tarlang. Budget sang ber dawttu pawh Guns N' Roses music video lar ber tih hial ngam 'November Rain' kha a ni bawk.
Music Video siamna atana sum seng hnem GnR
Guns N' Roses hi an music video a hmuhnawm ṭhin a, uluk pawh an uluk ṭhin. Music video siamna atan pawh sum an seng hnem ṭhin hle ang tih a rinawm. Chung zingah chuan kum 1993-a an tlangzarh 'Estranged' music video siamna atan khan sum an seng tam ber a, $maktaduai 4 tehmeuh an seng.
Keinin hmuhnawm ti taka kan lo thlir liam mai ṭhinah khan sum tam tham tak an lo seng a, minute kua laia thui music video a ni bawk a, an music video hoah chuan sum an sen tamna ber a ni hi a mak lo a, mahse $mtd 4 lai an lo seng erawh hi chu mi tam tak mak tih a nih ve ngei a rinawm.
'Estranged' music video kha Andy Morahan direct a ni a, Del James video series pathumna niin 'Don't Cry' leh 'November Rain'-te nen khan trilogy niin an sawi ṭhin. Live concert scene kha Olympiastadion, Munich, Germany-a an shoot a ni.
November Rain mawlh mai kha
Sawi zau vak pawh ngai lo, en mai pawha music video hmuhnawm tak 'November Rain'-ah khan $mtd 1.5 lai zu han seng bawk a! Hard rock music video zinga sum sen tamna ber dawttu a ni.
Del James-a thawnthu tawi behchhana siam 'November Rain' music video kha chu a hit pawh a hit rem rem hle a, YouTube lamah pawh thlirtu tluklehdingawn 1.4 chuang an awm tawh. YouTube siam chhuah a nih hmaa music video siam, thlirtu tld nei tling hmasa ber a ni a, 90's music video thlirtu tld nei tling hmasa ber a ni bawk. Sum tam tak sen man a awm an tih ve ngei pawh a rinawm.
My Chemical Romance music video pathumna a ni
My Chemical Romance pawh hian music video hmuhnawm tak tak an nei ṭhin. An music video hmuhnawm tak 'The Ghost of You'-ah khan $mtd 1 lai an seng a, music video siamna budget sang pathumna a ni. Kha video-ah khan an indo nasa bawka sum an seng tam pawh kha a mak hran lo e.
Garbage 'Push It' chu palina niin $750,000 an seng a, Blink-182 'Rock Show' kha pangana a ni a, $500,000 an seng a ni.