Zack Snyder Justice League 'October'-ah shoot ṭha dawn!

Zack Snyder Justice League director's cut nakkumah tlangzarh a ni dawn tih chu uar taka tarlan a ni tawh ṭhin a, scene ṭhenkhat an shoot ṭha dawn tih thawm a awm erawhin mi mak tih a hlawh hle.

Snyder leh HBO Max-te'n May thlaa thuchhuah an siamah kha chuan $maktaduai 20-30 vel  Warner Bros. Pictures leh HBO Max-te'n an sen belh dawn tih chiah tarlan a ni a, chu chu visual effect, background score leh a ṭul a nih chuan dialogue thar atan hman a ni dawn tih chauh sawi a ni bawk. Mahse tunah chuan ruahmanna dang an nei deuh a nih hmel a, thla tharah hian kar khat chhung Zack Snyder ho hian shooting an nei ṭha dawn.

Ben Affleck, Henry Cavill, Gal Gadot leh Ray Fisher-te chu scene an shoot ṭhat turah hian an tel dawn niin an sawi a, chutih rual chuan Jason Mamoa leh Ezra Miller-te hming erawh sawi lan a ni lo thung a, anni pahnih lanna scene-ah shoot ṭhat ngai a awm dawn lo pawh a ni mahna.

Snyder cut reshoot chungchang tarlang hma­satu chu The Hollywood Reporter a ni a, a report thar tihchhuah hi a rintlak turah beisei ila, chuti a nih chuan Justice League 2017-a kan la hmuh loh scene chu kan beisei aia tam kan hmu dawn a nih hmel.