Jeje-an chawimawina bik a dawng dawn

Mizorama music award hlun ber, Lelte Award vawi 24-na chu zanin dar 8 hian Lal Thanhawl Auditorium, Congress Bhavan-ah sem a ni dawn ta. Lelte Award hian nakkum hi a vawi 25-na tur a ni a, chumi pual atan chuan tun aṭangin inbuatsaihna pawh telh chhoh ṭan a ni.

Lelte Awards vawi 24-naah hian category 31 awmin, heng zinga Young Achiever Award leh Special Award te erawh puan chhuah lawk a ni. Young Achiever Award hi Mizo footballer hlawhtling, Jeje Lalpekhlua hnenah hlan a ni dawn a, C. Zoram­muana, Mizoram Bad­min­ton Association President hnen­ah Special Award hlan a ni bawk ang. Zorammuana hian bad­minton-ah Mizoram player-te hmun tam takah a lo hruai tawh a, hlawh­tlinna ropui tak tak an lo hawn tawh a ni.

Award show-ah hian tunlaia zaithiam lar ber berte an inlan dawn a, chung zingah chuan Pensy B.Lalthangliani, Bethsy Lalrin­sangi, Lalnunsanga (T.Melody), Lalzar­mawia, DJ Lalven­himi, J. Lal­rem­ruati, Sawm­tea, TBC-a te a langsar an ni. Chibil Award dawng turin Tahan, Tripura leh Manipur aṭang­in an rawn thleng tawh bawk.

Zai tur zinga mi DJ Lalvenhimi hi Best Music Video (Lengzem/ Lenglawng), Female Singer of the Year-ah te a lang. Pensy-i leh Bethsy-i te pawh hi Female Singer of the Year (Gospel)-ah an lang ve ve bawk. Sawmtea hi Male Singer of the Year (Gospel)-ah langin, Lalnunsanga hi lengzem huang chhunga Male Singer of the Year-ah a lang bawk.

Lelte Award hi kum 1984 aṭanga sem ṭan kha a ni a, kum 2000 aṭang khan kum tinin sem ṭhin a ni. Kumin hi vawi 24-na tur a ni a, nakkum khi vawi 25-na a ni dawn a, hemi pual hian trophy pawh siam danglam a ni. En man a awm dawn lo a, a duh apiang tan en theih a ni ang.