Box Office: 'Beetlejuice Beetlejuice' in ro a la rel

Tim Burton 1988 classic, 'Beetlejuice' sequel, 'Beetlejuice Beetlejuice' chuan North American box office-ah ro a la rel zel a, a kar hnihnaah North America-ah USD mtd 51.6 lak luh belhin, No 1 a la ni chhunzawm zel.

Winona Ryder, Michael Keaton leh Jenna Ortega-te channa, 'Beetlejuice Beetlejuice' hian internationa-ah USD mtd 28.7 hmuh belh bawkin, a sum hmuh chhuah hi USD mtd 264.3 a tling tawh.

No 2-ah Universal Pictures leh Blumhouse pyschological horror film thar 'Speak No Evil' a rawn lang a, tlangzarh karah USD mtd 11.5 la lutin, No 1 nena an sum lak luh erawh a inthlau hle. He film hi 2022 Danish film remake a ni a, international-ah USD mtd 9.3 a la lut bawk a ni.

'Deadpool & Wolverine' chuan a kar riatnaah USD mtd 5.2 a la hmuh belh thei a, No 3-ah a la awm. Superhero blockbuster hian North America bikah USD mtd 621.5 zet la lut tawhin, hetiang dinhmun thleng thei film 15 zingah a lang pha a ni. Sawizui hlawh tam, conservative blogger Matt Walsh documentary, 'Am I Racist?' chu No 4-ah a rawn lang a, USD mtd 4.8 a la lut. He documentary hian chi inthliarna lama inhnialna a rawn chawk nung thar leh nasa hle a, CinemaScore-ah 'A' a hmu pha.

August 30-a tlangzarh, Dennis Quad channa, US president 40-na Ronald Reagan biopic, 'Reagan' chuan No 5-ah a la lang bawk. Rotten Tomatoes lamah critic review ṭha lo viau mah se, entu a la ngah zel a ni.