Inter School Public Speaking Competition zo ta

Lamtluang Lifeskills Academy leh Zonet cable TV ṭangkawpin an buatsaih, Inter School Public Speaking Competition Grand Finale chu Thawhlehni, September 17, 2024 zan khan Dawrpui Multi Purpose Hall-ah neih a ni. Middle School-ah Jabeza Lalrempuia, St. Andrew's School, High School-ah Esther Lawmsangzuali, Pine Mount leh Higher Secondary School-ah Martin C. Lalrozama, Govt Mizo HSS te chu pakhatna an ni.

Inter School Public Speaking Competition hi September 9 aṭang khan ṭan niin, September 13-ah grooming session neihpui an ni. September 17 chawhma lamah Top 10 intihsiakna neiin, section tinah a ṭha zual pathum thlan chhuah an ni a, Top 3 te hian a zanah Grand Finale hi an nei leh nghal a ni. He intihsiaknaa endiktute chu - Vanneihtluanga, Dr. J.T. Vanlalngheta, Janis Hnamte leh Nathael Vanchhawng (Life Coach) te an ni.

Grand Finale-ah hian education minister, Dr Vanlalthlana chu khuallian a ni a, zirlaite tana hetiang ang platform changkang leh ṭha tak buatsaihtu, Lamtluang Lifeskills Academy te fakin, an chungah lawmthu a sawi. Chief judge Vanneihtluanga pawhin thu sawiin, he competition hian thil ṭha tak a hrin chhuah ngei tur thu a sawi bawk.